«Дьиэ кэргэн» өрөспүүбүлүкэтээҕи хапытаал кээмэйэ икки төгүл улаатыаҕа

Ил Дархан Айсен Николаев «Дьиэ кэргэн-2023» өрөспүүбүлүкэтээҕи бэстибээлгэ «Дьиэ кэргэн» өрөспүүбүлүкэтээҕи ийэ хапытаалын  кээмэйин улаатыннарар туһунан быһаарыы ылыллыбытын иһитиннэрдэ.

Ол курдук, дьиэ кэргэҥҥэ үһүс уонна онтон элбэх оҕо төрөөтөҕүнэ икки төгүл элбиэҕэ.
Ил Дархан СӨ Үлэҕэ уонна социальнай сайдыыга министиэристибэтигэр бу боппуруоһу үөрэтэргэ сорудахтаата.
«Дьиэ кэргэттэр оҕо төрөтөр туһунан быһаарыыны федеральнай өйөбүлгэ эрэ буолбакка, өрөспүүбүлүкэ өйөбүлүгэр тирэҕирэн ылыныллара суолталаах. Ол иһин, үһүс уонна онтон элбэх оҕо төрөөтөҕүнэ өрөспүүбүлүкэтээҕи ийэ хапытаалын икки төгүл, 300 тыһыынча солкуобайга диэри улаатыннарар туһунан быһаарыы ылынным», -– диэтэ Айсен Николаев.
Билигин өрөспүүбүлүкэҕэ 30-34 уонна 35-39 саастаах дьахталлар  ахсааннара 5,7% элбээтэ. Кинилэр үһүс уонна онтон элбэх оҕону төрөтөллөр.