Дьиэ кэргэн ипотекатыгар уларыйыылар киирдилэр

Олунньу 1 күнүттэн 40 көрүҥ босуобуйаларга, төлөбүрдэргэ индексация оҥоһуллуоҕа. Маны тэҥэ, кэккэ уларыйыылар, холобур, Дьиэ кэргэн ипотекатын усулуобуйатыгар  киириэхтэрэ. 

РФ үпкэ министиэристибэтэ 2025 сыл алтынньы 1 күнүгэр ылыммыт быһаарыытынан, «Дьиэ кэргэн ипотеката» бырагырааманан ипотека кирэдьиитин ыларга хааччахтар киирдилэр.

Билигин биир ыал Дьиэ кэргэн ипотекатын бырагырааматынан биир эрэ кирэдьиити ылар кыахтаах. Кэргэнниилэр бэйэ-бэйлэригэр «созаемщик» буолаллар.

Урут Дьиэ кэргэн ипотекатын кэргэнниилэр иккиэн ылар кыахтаах этилэр.

Дьиэ кэргэн ипотекатыгар 6 бырыһыаннаах кирэдьиити биэрэллэр. Ол эрээри бу чэпчэтиилээх ипотеканы 7 сааһыттан кыра оҕолоох дьиэ кэргэттэр эрэ ылар бырааптаахтар.

Маны тэҥэ, бу бырагыраамаҕа «донорскай ипотека» диэн суох буолла. Ол эбэтэр, бу иннинэ 7 саастарын ааспыт оҕолоох ыаллар уонна оҕото суох ыаллар «созаемщик» быһыытынан 7-тэн кыра саастаах оҕолоох дьиэ кэргэттэри ыҥыран, чэпчэтиилээх кирэдьиити ылар кыахтаах этилэр.