Дьиэ кэргэн күнүгэр 12 оҕону үөрүүлээх быһыыга-майгыга балыыһаттан таһаардылар

Бүтүн Арассыыйатааҕы дьиэ кэргэн күнүгэр Дьокуускай куорат өрөспүүбүлүкэтээҕи клиническэй балыыһа Перинатальнай кииниттэн 12 оҕону үөрүүлээх быһыыга-майгыга балыыһаттан таһаардылар. Бүгүн 9 уол, 3 кыыс балыыһаттан таҕыста, ону кытта 3 ыал элбэх оҕолооҕунан ааттанна. Бу туһунан СӨ Үлэҕэ уонна социальнай сайдыыга министиэристибэ пресс – сулууспата иһитиннэрэр. 

Анна Юрьевна уонна Анатолий Александрович Поповтар дьиэ кэргэттэригэр игирэ уолаттар төрөөтүлэр.

СӨ Үлэҕэ уонна социальнай сайдыыга миниистир Елена Волкова төрөппүттэри уонна оҕолору эҕэрдэлээтэ, кытаанах доруобуйаны, байылыат олоҕу баҕарда.

“Бүгүн хас биирдиибитигэр улахан суолталаах уонна өрөгөйдөөх түгэн. Оҕо күн сирин көрүүтэ – дьиэ кэргэҥҥэ улахан дьол уонна үөрүү. Ону таһынан, сүҥкэн эппиэтинэс, боччумнаах хардыы», — диэн кини бэлиэтээтэ.

Бу күн миниистир 12 саҥа олохтооххо Ил Дархан Айсен Николаев аатыттан «Дети Столетия” хапытаал туттарда. Саха Сирин Саахсатын управлениетын салайааччыта Тамара Кривошапкина биэс оҕоҕо төрөөбүттэрин туоһулуур сурук туттарда.

Эльдар Садовников