Дьиэ кэргэн, Оҕо саас сылынан оскуолабытыгар сэтинньигэ кэккэ тэрээһиннэр буоллулар

Арассыыйаҕа Дьиэ кэргэн, өрөспүүбүлүкэҕэ Оҕо саас сыла түмүктэнэн эрэр. Дойдубут араас муннуктарыгар сыл бэлиэтин чорботон элбэх тэрээһин буолан ааспыт буолуохтаах. Биһиги оскуолабыт онтон туора турбата.

Өлүөхүмэ улууһун А.Л.Бахсыырап аатынан Кыыллаах орто оскуолата бу ааһан эрэр сылы көхтөөхтүк бэлиэтээбит түгэнннэриттэн сырдатан ааһабыт.

Сэтинньи бүтүүтэ оскуола алын кылааһын оҕолоругар уонна кинилэр төрөппүттэригэр «Аҕам, ийэм уонна мин – спортивнай дьиэ кэргэн» диэн эти-сиини чэбдигирдэр күрэх буолан ааста. Манна барыта түөрт хамаанда кытынна. Күрэх дойдубут уонна Сахабыт сирин Өрөгөй ырыатын тыаһынан өрө күүрүүлээхтик арылынна. Хамаандалар эрдэ ылбыт сорудахтарын толордулар: бэйэни билиһиннэрии, девиз.

Оонньуу кыайыылаахтары чиэстээһининэн түмүктэннэ. Ол курдук, үһүс миэстэни Еремей Андреевич, Екатерина Николаевна уонна 2 кылаас үөрэнээччитэ Элина Сокорутовтар дьиэ кэргэттэрэ ыллылар.

Иккис миэстэҕэ – Фёдор Иванович, Лидия Анатольевна уонна 4 кылаас үөрэнээччитэ Мичийэ Худаевтар тигистилэр.

Бастакы миэстэҕэ Слепцовтар дьиэ кэргэттэрэ кыайыы өрөгөйүн биллилэр: Александр Дмитриевич, Диана Дмитриевна уонна 3 кылааска үөрэнэр кыыстара Алеся.

Виктор Иннокентьевич, Анна Иннокентьевна, кыыстара 1 кылаас үөрэнээччитэ Виктория Даниловтар «Иллээх дьиэ кэргэн» анал ааты сүктүлэр.

Күрэх бэрт тыҥааһыннаахтык ааста. Кыттааччыларбыт олус үөрэн-көтөн, сүргэлэрэ көтөҕүллэн илии тутуурдаах, өттүк харалаах тарҕаспыттарыттан тэрийээччилэр олус астынныбыт.

Түгэнинэн туһанан, оонньууну иилээн-саҕалаан ыыппыт биир идэлээхпитигэр, эдэр учууталбытыгар Филипп Сергеевич Ларионовка махталбытын тириэрдэбит.

Ити күрэх кэнниттэн аны орто уонна үрдүкү кылаас оҕолоро төрөппүттэрин кытта «Квест-оонньуу» оонньууга холонон көрдүлэр.

Оонньуу олус сэргэхтик ааста. Күрэхтэһээччилэр төрөппүттэр уонна оҕолор хамаандалара хайдыһан оонньоотулар. «Тохтобулларынан» араас сорудахтаах моһоллору аастылар — хамсаныылаах даҕаны, өйү да тургутан көрүүлээҕэ олус интэриэһиэй буолла. Оонньуу «Доҕордоһуу кыайда!» диэн девизтаах түмүктэннэ. Хамаандаларбытын оскуола асчыттара астаабыт минньигэс туортарынан күндүлээтибит.

Төрөппүттэрбитигэр – дьиэ кэргэттэргэ көхтөөх кыттыыларын иһин махтанабыт. Ол курдук, 5 кылаастан Корниловтарга: Ангелина Аркадьевна, кыыһа Айыына; 6 кылаастан Шестаковтарга: Елена Викторовна, уола Рома; 7 кылаастан Павловтарга: Мария Ильинична, кыыһа Нелли; 8 кылаастан Торговкиннарга: Любовь Симовна, уола Сим; 10 кылаастан Акимовтарга: Ольга Афанасьевна, уола Никита.

Олоҥхо нэдиэлэтин чэрчитинэн өйү тургутар «Өркөн өй» күрэҕэ буолла. Манна үс дьиэ кэргэн бэйэ-бэйэлэрин кытта олоҥхо эйгэтиттэн билиилэрин тургутан көрдүлэр. Оонньуу үс кыайыылааҕынан түмүктэннэ. Добун сурук үһүс үрдэлигэр Кугасовтар дьиэ кэргэн тигистэ: Нина Николаевна кыыһынаан Александралыын (8 кыл). Добун сурук иккис үрдэлин Семеновтар ыллылар: Сардана Александровна уолунаан Дьулустаанныын (10 кыл). Бастакы үрдэллээх добун суругу Корниловтар – Светлана Николаевна уонна Александр (7 кыл) тутан үөрүүлэрэ үгүс. Маны таһынан харчылаах сэртипикээтинэн уонна минньигэс бэлэҕинэн наҕараадаланнылар. Күрэһи саха тылын учуутала Банчина Айталина Аркадиевна иилээн-саҕалаан ыытта.

Маннык тэрээһиннэр оҕону уонна төрөппүтү түмэллэрин таһынан, үүнэн эрэ көлүөнэҕэ дьиэ кэргэн сыаннастарын өйдөбүлүн тириэрдэллэр.

Бу буолан ааспыт тэрээһиннэр, биллэн турар, кылаас салайааччыта суох кыаллыбат. Кинилэр төрөппүтү уонна оҕону кытта ситимнэрэ чугас буолан, кыттааччыларынан кэмигэр хааччыйаннар улахан көмө буоллулар.

Маны таһынан оскуола үлэтин мэлдьи бирииһинэн өйүүр, өйдүүр, көмө-тирэх буолар нэһилиэкпит баһылыгар Александр Гавриилович Макаровка, «Надежда» маҕаһыын урбаанньытыгар Корнилов Пётр Афанасьевичка, «Сайдам» маҕаһыын — Владимирова Нюргуяна Аркадьевнаҕа уонна чааһынай урбаанньыт Петров Егор Васильевичка барҕа махталбытын биллэрэбит.

Полина Максимова, Кыыллаах орто оскуолатын социальнай педагога.