Дьиэ кэргэн сылын түмүктүүр үөрүүлээх тэрээһин буолла

• «Кыһыл көмүс ыал» — Алексеевтар (Сунтаар);
• «Элбэх оҕолоох ыал» — Новгородовтар (Нам);
• «Оҕону иитэр ыал» — Павловтар (Дьокуускай);
• «Тыа сирин ыала» — Сидоровтар (Мэҥэ Хаҥалас);
• «Көс ыал» — Соловьёвтар (Муома);
• «Эдэр ыал» — Владимировтар (Ньурба);
• «Үйэлээх үгэстээх ыал» — Рязанскайдар (Амма).

Сааланы толору бастыҥ ыаллар, кинилэр аймахтара киэргэнэн-симэнэн, үөрэн-көтөн, олороллор. Үгүс ыаллар оҕолорун, эбэлэрин-эһэлэрин илдьэ кэлбиттэр. Бу көлүөнэлэр утумнарын көрдөрөр.

«Оҕону иитэр ыал» номинацияҕа Павловтар кыайыахтарын кыайдылар. Кинилэр саха, нуучча, омук диэн араарбакка, сүүрбэччэ оҕону ылан, иитэллэр, ийэ, аҕа тапталын, дьиэ кэргэн сылаас эйгэтин иҥэрэллэр. Интэриэһинэйэ диэн, оҕолорун барыларын сахалыы иитэллэр. Оҕолоро бэрт түргэнник сахалыы саҥараллара, үгэстэри ылыналлара сөхтөрөр. Ол онно дьиэ кэргэн истиҥ эйгэтэ дьайар буолуохтаах.

Мустубут дьиэ кэргэттэри  бырабыыталыстыба бэрэссэдээтэлин солбуйааччы Георгий Степанов эҕэрдэлээтэ.

— Дьиэ кэргэттэри өйөөһүн — судаарыстыбаннай бэлиитикэ төрүтэ буолар. Ыал үчүгэйдик олорор буоллаҕына, уопсастыба, онтон судаарыстыба үчүгэйдик олорор. Дьиэ кэргэн төрүтэ үйэлээх үгэспит буолар. Онон өрөспүүбүлүкэҕэ дьиэ кэргэттэри, ийэ-аҕа буолууну өйүүр миэрэлэр көдьүүстээхтик үлэлииллэр. Былырыын 1 мөлүйүөн ахсааны ситиспиппит. Дьиэ кэргэн сылыгар төрөөһүнү уонна оҕо ахсаанын элбэтэргэ туһуламмыт миэрэлэри ылыммыппыт. Элбэх оҕолоох дьиэ кэргэттэри өйүүргэ саҥа миэрэлэр ылыныллыбыттара.

25-рин туола илик уоллаах кыыс ыал буоллахтарына, биирдэ бэриллэр төлөбүр олохтоммута. Өрөспүүбүлүкэтээҕи ийэ хапытаалын суумата икки бүк улааппыта. Демографияҕа бастыҥ көрдөрүүлээх улууска, куоракка Ил Дархан грана олохтоммута, — диэн кини эттэ.