“Дьиэ кэргэнинэн бары бииргэ” бырайыакка көхтөөхтүк кыттыҥ

Соторутааҕыта дойдуга барытыгар “Дьиэ кэргэнинэн бары бииргэ” улахан федеральнай бырайыак  саҕаламмыта. Бырайыакка ким баҕалаах кыттыан сөп. Дьиэ кэргэттэр котуокка, мусуойга, киинэҕэ  бииргэ барыахтаахтар уонна хаартыскаҕа түһүөхтээхтэр.

Дьиэ кэргэнинэн бары хайдах сынньаммыттарын эбэтэр сөбүлүүр дьарыктарын түһэрэн социальнай ситимнэргэ таһаарыахтаахтар. Саамай көхтөөх ыалларга тэрийээччилэр бириистэри туттарыахтара. Ол гынан баран, сүрүнэ – төрөппүттэр уонна оҕолор бириэмэлэрин  туһалаахтык  бииргэ атааралларыгар олус үчүгэй”, — диэн СӨ үлэҕэ уонна социальнай сайдыыга миниистирэ Елена Волкова “Якутия 24” ханаалга кэпсэтиигэ эттэ.

“Дьиэ кэргэнинэн бары бииргэ” бырайыак дойду бэрэсидьиэнэ биллэрбит Дьиэ кэргэн сылыттан саҕаланна. Онуоха аан бастаан всейсемьей.рф саайтка эбэтэр VK уонна  ОК социальнай ситимнэргэ “Дьиэ кэргэнинэн бары бииргэ” бөлөхтөргө регистрацияланыллар,  #всейсемьей хэштеги булгуччу туһаныҥ.

Тэрийээччилэр кыттааччыларга ыйга биирдэ араас бириистэри, сүүйүүлэри толкуйдаатылар. Онтон кулун тутар бүтүүтэ Арассыыйа устун айанныыр 100 дьиэ кэргэн путевкатын оонньотуохтара.  Саха сириттэн 500 ыал хайыы үйэ бырайыакка кыттыста.