Дьиэ кэргэнинэн олоҥхону ааҕыыга күрэс биллэрилиннэ

Быйыл РСФСР уонна Саха АССР култууратын үтүөлээх үлэһитэ С.А. Зверев-Кыыл Уола төрөөбүтэ 125 сылын туолар. Итинэн сибээстээн, 2025 сыл Сунтаар улууһугар Кыыл Уолун сылынан биллэриллибитэ. Сыл устата элбэх тэрээһиннэр буолуохтаахтар.

Сунтаар улууһун киин бибилэтиэкэтэ «Айхал эйиэхэ, аар тайҕа» улуустааҕы уус-уран ааҕыы көрүү-күрэһин биллэрдэ. Манна дьиэ кэргэттэр олоҥхону уус-ураннык ааҕаллар уонна видеоҕа устан ыыталлар.

Күрэскэ кыттыы ирдэбилэ: сахалыы таҥастаах эр киһи, дьахтар уонна оҕо буолан кытталлар. Сааһыттан тутулуга суох, дьиэ кэргэнинэн, эбэтэр, ийэ, аҕа ууһунан аймахтар кыттыахтарын сөп. Ааҕыы бириэмэтэ хааччахтаммат. Биир дьиэ кэргэн олоҥхо-тойугу толору ааҕар (толорор). Виедоҕа устуу хаачыстыбалаах буолуохтаах.

Сайаапкалары нэһилиэк биилэтиэкэлэригэр суруйаллар. Сунтаар сэлиэнньэтин олохтоохторо уонна атын улуустарга олорооччулар sunlibrary.orch@mail.ru электроннай буостаҕа, эбэтэр, киин бибилэтиэкэҕэ кэлэн биэриэхтэрин сөп. Билсэр төлөпүөн: 8(41135) 22191.

Маны тэҥэ, бүгүн, тохсунньу 30 күнүгэр, Дьокуускайга Өксөкүлээх Өлөксөй аатынан Норуоттар доҕордоһууларын дьиэтигэр Кыыл Уолун сылын өрөгөйдөөх аһыллыыта буолуоҕа. Күнүс 3 чаастан Сунтаар алгыстаах оһуокайын, олоҥхотун, тойугун түһүлгэтэ, улуус бэйэ оҥорон таһаарар бородууксуйатын атыыта-эргиэнэ, уустар, уран тарбахтаахтар быыстапкалара, Кыыл Уолун олоҕун сырдатар кинигэ быыстапката тэриллиэхтэрэ.

Киэһэ 6 чаастан «Улуу киһи утума» диэн улахан кэнсиэр буолуоҕа, төлөбүрэ 1000 солкуобай. Сунтаартан улахан дэлэгээссийэ кэлэн, биир дойдулаахтарыгар, улуу киһи талааныгар сүгүрүйээччилэригэр дьоро күнү бэлэхтиэхтэрэ, Олоҥхо дойдутун дьиҥ сахалыы тыынын тиэрдиэхтэрэ.