Дьиэ кэргэҥҥэ – сылааһы

Ыам ыйын 21 күнэ —  Арассыыйаҕа  территориальнай уопсастыбаннай бэйэни салайыныы күнэ буолар. ТОС-тар нэһилиэк, улуус, өрөспүүбүлүкэ сайдыытыгар  төһүү күүс буолаллар. Ол курдук, кинилэр бырайыактара үбүлэнэн, олохтоохтор бэйэлэрин көҕүлээһиннэринэн араас бырайыактар олоххо киирэллэр. Олохтоох бэйэни салайыныы былааһы кытта тэҥҥэ үлэлээн, олорор сири тупсаҕай оҥостоллор,  суол-иис оҥороллор, көннөрөллөр; искибиэрдэри, оҕо оонньуур былаһааккаларын оҥостоллор.

Киин ититиниигэ холбоммут, толору хааччыллыылаах дьиэ-уот аныгы олох ирдэбилэ буолар. БиҺиги Сахабыт Өрөспүүбүлүкэтин салалтата дойдубут хас  биирдии олохтооҕо уйгулаах олохтонорун туһугар кыһамньытын  уонна болҕомтотун ууран, сыл аайы араас бырагыраамалары үлэлэтэр.

Олортон биирдэстэринэн   бэйэни салайынан олорор түөлбэлэр икки  ардыларыгар ыытыллыбыт куонкурус буолар. Бу куонкуруска биһиги улууспут ситиһиилээхтик кыттан, Ил Дархан Гранын ылан, аны улуус иһигэр ыыппыт куонкуруһугар Орто-Амма нэһилиэгэр “Теплица”  бэйэни салайынан олорор түөлбэ (ТОС) (салайааччы Д.Е. Соломонова)  “Дьиэ-кэргэҥҥэ- сылааһы” диэн бырайыагынан кыттан кыайыылаах тахсыбыппыт. Бу “Теплица”   түөлбэбитигэр Орто-Амма нэһилиэгин кытыы учаастагар дьиэ-уот туттан олорор сүүрбэччэ ыал олоробут. Биһиэхэ  киин хочуолунайтан ититэр ситим кыайан тардыллыбат буолан, баччааҥҥа диэри оһох оттор кыһалҕатын көрсөн олоробут. Уонча сыл олохтоохтор туруорсууларын, баар кыһалҕаны туһааннаах министиэристибэлэр, Саха сирин бырабыыталыстыбаа үөрэтиилэрин түмүгэр, туспа хочуолуонай тутуута былааҥҥа киирэн саҕалааһын үлэлэр ыытыллан, кэлэр сылга дьэ ититии киирэрэ былааннанарыттан олус үөрэн олоробут. Онон бу бырайыакпыт  сыала-соруга диэн түөлбэбитигэр олорор ититии систиэмэтин тардарга турба атыылаһарга  элбэх оҕолоох ыалларбытыгар, аҕам саастаах дьоммутугар, анал байыаннай дьайыы кыттыылаахтарыгар, инбэлиит оҕолоох уонна соҕотох ийэлэрбитигэр көмө оҥоруута буолар. Манна Өрөспүүбүлүкэ бүддьүөтүттэн 477 000 солкуобай көрүллэн,  “Металлторг” диэн тэрилтэни кытта дуогабардаһан  турба атыыластыбыт. Турбабытын бэйэбит түөлбэбит  урбаанньыта Альберт Елисеевич Васильев тиэйэн аҕалан  дьаарыстаан биэрдэ. Ити  курдук, олус наадалаах  “Дьиэ кэргэҥҥэ – сылааһы” диэн бырайыакпыт сүрүн үлэтин  2024с «Дьиэ-кэргэн сылыгар» ситиһиилээхтик оҥордубут. Бырайыакпыт сүнньүнэн олохтоохтору уопсастыбаннай үлэҕэ көҕүлүүр, чөл олоххо тардар араас тэрээһиннэр, күрэхтэһии  ыытыллыбыта. Тыйыс тымныы кыһыннаах дойду олохтоохторо,  саамай баҕарар баҕабыт туолан- бэлэм сылаас дьиэҕэ олорон, бар-дьон туһугар үлэлиир-хамсыыр, кыһалҕата суох оҕолорбутун иитэр, сиэннэрбитин көрсөр-харайсар, сөбүлүүр дьарыкпытынан дьарыктанар кэммит кэлиэ, хочуолунайбыт тутуллан өрөгөйдөөх аһыллыытыгар үөрүөхпүт-көтүөхпүт  диэн олус эрэнэбит. Ил Дархан Грант олохтоон, куонкурустары ыытан, түөлбэлэр сайдыыларыгар кыах биэрэригэр, төһүү күүс буолар.

Күндү актыбыыстар! Үлэҕит, тулуургут, актыыбынайгыт иһин ис сүрэхпиттэн ТОС-тар күннэринэн эҕэрдэлиибит! Бииргэ түмсэн өссө үрдүк ситиһиилэргэ тиийэр, үүнэр көлүөнэҕэ сөптөөх инникини хааччыйыахпытын сөп!

 Светлана ВИНОКУРОВА,   “Теплица” бэйэни салайыныы түөлбэ олохтооҕо