Дьиэ кэргэттэргэ тохтообут төлөбүрдэри хаһан ыыталларын быһаардылар

Бастакы төлөбүрдэр сэтинньи 14 күнүгэр киириэхтэрэ. Ол эрээри, төлөбүрдэри бу сыл атырдьах ыйын 22 күнүгэр диэри сайаапка биэрбиттэр эрэ ылыахтара.

Дьиэ кэргэттэр Саха сиринээҕи «Дьиэ кэргэн» ийэ хапытаалын, «Үйэ оҕолоро» тус сыаллаах хапытаалын уонна сир учаастагын оннугар бэриллэр харчынан толуйуу төлөбүрдэрин  ылыахтара. Харчы счетка түһэр кэмэ – 3 хонукка диэри,  баан үлэтиттэн көрөн. Министиэристибэ иһитиннэрэринэн, төлөбүрдэр болдьоҕуттан хойут түһүүтэ үп-харчы аҕыйах киирбитэ буолар.

«Төлөбүрдэри күүтэр дьиэ кэргэттэри өйдөөн, төлөбүрдэр түргэнник түһэллэрин быһаарыахпыт диэн эрэнэбит», – диэн министиэристибэҕэ бэлиэтээтилэр.

Оттон бу сыл атырдьах ыйын 22 күнүттэн хойутаан сайаапка биэрбит дьиэ кэргэттэргэ төлөбүр түһэр кэмэ чопчу биллибэккэ турар. Министиэристибэ быһаарбытынан, кинилэр сайаапкалара эбии бүддьүөккэ үп-харчы көмөтө кэллэҕинэ толоруллуоҕа.