Дьиэ салгынын ыраастыыр сибэккилэр

Дьиэбитин, кыбартыырабытын тупсаҕай көстүүлээри араас малы-салы, миэбэли атыылаһабыт. Кырдьыгын эттэххэ, хаһаайка үксэ бу састаабыгар болҕомто уурбакка, тас көстүүтүн эрэ көрөр. Оттон балар араас састаабы таһаарыахтарын сөп. Дьиэҕэ мунньуллар куһаҕан салгыны сибэкки ыраастыыр кыахтаах. Ханнык?

Сибэкки үүннэриитинэн дьарыктанар дьон бастакы миэстэҕэ хлорофитуму чорботон бэлиэтииллэр, ону ааһан, дьиэ тыҥата (“легкие”) диэн ааттыыллар. Бу сибэкки туох баар куһаҕан салгыны бэйэтигэр иҥэринэр кыахтаах эбит. Хаппырыыһа суоҕунан биллэр, онон ким баҕарар үүннэрэр кыахтаах.

Иккис миэстэҕэ, бенджамин фикуһа турар. Бэйэбит да билбэппитинэн дьиэ быылын кытта балачча элбэх куһаҕан салгыны, вируһу эҕирийэ сырыттахпыт. Бенджамин фикуһа дьиэ быылын, пластиктан, сорох миэбэлтэн тахсар куһаҕан салгыны хомуйан ылар уратылаах.

Үһүс миэстэҕэ спатифиллум турар. Атыннык женское счастье диэн ааттанар. Хаһаайкалар сибэккитин туһугар олордоллор, дьиэни ыраастыырын үгүстэр билбэт да буолуохтаахтар. Түүнүк споратын, ону таһынан, формальдегид, трихлорэтилен салгынын суох оҥорор. Бу сибэккини дьиэҕэ антуриуму (мужское счастье) кытта тутар ордук табыллар диэн бэлиэтииллэр.

Төрдүс миэстэҕэ сансевиерия сибэкки турар. Атыннык “тещин язык” диэн ааттыыллар. Балачча бытааннык үүнэр, хаппырыыһа суох сибэкки. Кислород генераторынан биллэр, ону ааһан, иммунитеты бөҕөргөтөр уонна табах буруотуттан харыстыыр дииллэр.

Бэһис миэстэҕэ герань сибэкки турар. Бу сибэккиттэн дьон аллергиялыыр дииллэр эрээри, араас микробу уонна бактерияны кытта охсуһар күүстээҕинэн биллэр. Герань эфирнэй арыылаах буолан, барсар дьонугар чахчы көмөлөһөр кыахтаах. Утутар, уоскутар диэн бэлиэтииллэр.