Дьиэ ылаары албыннаппыт дьон кыбартыыраларын күлүүһүн сотору ылыахтара

Саха сиригэр Өлүүлэһээччилэр бырааптарын көмүскүүр өрөспүүбүлүкэтээҕи пуонда уонна Саха сирин тутууга комплекса албыннаппыт өлүүлэһээччилэр  бары 2023 сыл бүтүүтэ кыбартыыраларын күлүүһүн ылалларын курдук соругу туруорунар.

«Саха сиригэр суобаһа суох тутааччылар дьайыыларыттан эмсэҕэлээбит дьон кыһалҕатын быһаарарга тиһиктээх үлэ ыытыллар. Албыннаппыт өлүүлэһээччилэр  бырааптарын көмүскээһин биһиэхэ сүрүн соругунан буолар. Ити сорукпут туолуохтаах”, — диэн  Ил Дархан Айсен Николаев эрдэ этэн турар.

Саха сиригэр билигин кинилэр кыһалҕаларын быһаарарга 4 дьиэ тутулла турар, ол иһигэр 2 дьиэ 2022 сылга үлэҕэ киллэриллэрэ былааннанар. Онтон икки эбийиэк 2023 сылга түмүктэниэхтээх. Ол курдук, 2023 сылга  200-тэн тахса  албыннаппыт өлүүлэһээччи бырааба көмүскэниэҕэ. Элбэх кыбартыыралаах дьиэлэр Чурапчыга уонна  Дьокуускайга тутуллан киириэхтэрэ.

2019 сыллаахха Саха сиригэр албыннаппыт өлүүлэһээччилэр  бырааптарын көмүскүүр өрөспүүбүлүкэтээҕи пуонда аһыллыбыта. Пуонда 444 албынаппыт  киһи  быраабын көмүскээтэ. Пуонда бырагырааматыгар уопсайа 10 кыһалҕалаах эбийиэк киирбитэ.