«Дьиэҕэ куоластыыр» туһунан сайабылыанньаны тутуу бэрээдэгэр уларыйыы киирдэ

Арассыыйа Киин быыбардыыр хамыыһыйата «Госуслуги» нөҥүө «дьиэҕэ куоластыыр» туһунан сайабылыанньаны тутуу бэрээдэгэр уларытыылары киллэрдэ.

2025 сыл Биир кэлим куоластааһын күнүн быыбарыгар сайабылыанньаны биэрии уонна обработкалааһын саҥа схемата үлэҕэ киириэҕэ. Онно туттарыллыбыт сайабылыанньа туһунан дааннай учаастактааҕы быыбардыыр хамыыһыйа тус кабинетыгар быһаччы онлайн эрэсииминэн ыытыллыа. Ону кытта хонтуруоллуурга бу дааннайдар үрдүкү территориятааҕы быыбар хамыыһыйатын уонна РФ быыбардыыр хамыыһыйатын тус кабинетыгар ыытыллыахтара.

Бу «Быыбар» судаарыстыбаннай автоматическай систиэмэни таһынан туттуллар эбии иһитиннэриини ылар источник буолар. Быыбардааччы сайабылыанньата учаастактааҕы хамыыһыйаҕа ыытыллыбытын туһунан төттөрү сибээһи ылыаҕа.

Быыбардааччы сайабылыанньатыгар эбии дааннайы ыйыы: подъезд, домофон, этээс нүөмэрэ уонна быыбардааччы санаатыгар наадалаах атын дааннайдар (комментарийдара) баар буолуо.

2024 сыллаахха Арассыыйа Бэрэсидьиэнин быыбарыгар уонна Биир кэлим куоластааһын күнүгэр куоластыыр сиртэн таһынан «Госуслуга» нөҥүө 24,9 тыһыынча быыбардааччы сайабылыанньа биэрбитэ.