Дьиэни арчылыырга

Дьиэни арчылыырга хайаан да дьиэ хайдах сиргэ тутулларын чинчийэр булгуччулаах.

Сорох дьиэ таһыгар улахан хаппыт мас (эбэтэр мастар) үүнэн турар буолааччы, былыргы айан суола ааһар эбэтэр тымныы салгын кэлэр сирэ буолуон эмиэ сөп. Ол — куһаҕан. Улахан мастарга дьон кырыыс тыла иҥэн хаалар эбэтэр абааһылар сөрүөстэллэр дииллэр. Ол иһин хаппыт мастары барытын тоһута тутан,  алдьатан, уматан кэбиһиэхтээххин.

Дьиэҕэ ыарытыйар киһи баар буоллаҕына, сотору-сотору дьиэлээх дьон айдаарсар, иһэр-аһыыр буоллахтарына, ытааһын-соҥооһун баар буоллаҕына, арчы сиэрэ-туома хаста да оҥоһуллуохтаах.

Сиэр-туом оҥоһуллар кэмэ ханнык баҕарар күҥҥэ буолар, ол гынан баран сарсыарда эрдэ оҥоһуллара ордук. Сахалар өйдөбүллэринэн, сарсыарда, ол эбэтэр саҥа күн үүнүүтэ — иччилэр, айыылар киһиэхэ хайыһар кэмнэрэ, ол иһин дьайаллара күүстээх буолар.

А.С.Федоров «Саха ыалын сиэрэ-туома» кинигэтиттэн.

«Айар», 2023 с.