Дьиэни тутабын диэн албыннаабыт…

4-с нүөмэрдээх Дьокуускайдааҕы полиция отделын дьуһуурунай чааһыгар куорат олохтооҕуттан түөкүннээһин туһунан иһитиннэрии киирбит.

Ол курдук эр киһи биир биллэр саайтка чааһынай  дьиэни тутуу туһунан биллэриини көрбүт.  Итиэннэ дьиэни тутар биригээдэ салайааччытын кытары көрсөн,  тутуу туһунан кэпсэппит уонна абаанса быһыытынан  170 тыһ. солк. биэрбит.  Ол кэнниттэн  биригэдьиир үлэни саҕалаабакка, наар тутуу  болдьоҕун уларытан испит, дьиэни олох да туппатах.

Холуобунай ирдэбил үлэһиттэрэ  26 саастаах хаста да сууттана сылдьыбыт уорбаланааччыны булбуттар.  Ол киһи олох даҕаны дьиэни тутар былаана суох эбит, ылбыт харчытынан бэйэтин  иэстэрин төлөөбүт.

РФ Холуобунай кодексын  159 ыст. 2 чааһынан  холуобунай дьыала көбүтүллүбүт диэн Ис дьыала министиэристибэтин пресс-сулууспата иһитиннэрдэ.