Хаартыска: култуура департамена
Ньурба улууһугар бу кэмнэргэ улахан суолталаах элбэх тэрээһиннэр буола тураллар. Ол курдук, 12-с төгүлүн ыытыллар, 30 сыллаах үбүлүөйдээх «Сата» тыйаатыр бэстибээлэ кулун тутар 29 күнүттэн саҕаланна.
Бу бэстибээлгэ Москва, Казань, Санкт-Петербург куораттартан тыйаатыр кириитиктэрэ кэлэн, 5 хонук устата өрөспүүбүлүкэбит бары тыйаатырдарын испэктээкиллэрин көрөллөр, сыаналыыллар.
Ньурбатааҕы судаарыстыбаннай тыйаатырга үлэлээбит, Дьиикимдэ нэһилиэгиттэн төрүттээх, СӨ үтүөлээх артыыһа, Саха тыйаатырын артыыһа Маргарита Борисоваҕа анаммыт «Абакайаада аартыгынан» моно-испэктээкил аһаҕас күрэһэ уонна Дьиикимдэтээҕи Норуот айымньытын дьиэтигэр кини аатын иҥэрии — «Сата» бэстибээл чэрчитинэн ыытыллар биир улахан тэрээһин.
Түгэнинэн туһанан, Арассыыйа куораттарыттан кэлбит ытык-мааны ыалдьыттарбытыгар Дьиикимдэ сиригэр-уотугар куйуурдааһын сиэрин-туомун көрдөрөн, ыалдьыттарбыт сүргэлэрин көтөхтүбүт. Онон «Абакайаада аартыгынан» бэстибээл өрөспүүбүлүкэнэн эрэ муҥурдаммакка, бүтүн Арассыыйаттан ыалдьыттарданан, Дьиикимдэ дьонун үөрүүтэ өссө үрдээтэ.
Бэстибээлгэ 12 кыттааччы Дьокуускай куораттан тиийэ кэлэн, киэҥ сири тайаан, тыйаатыры сэҥээрээччилэр, ускуустуба кэрэ эйгэтигэр куустарбыт дьон-сэргэ тоҕуоруһа мустан, үрдүк таһымнаахтык ааста. Дьүүллүүр сүбэҕэ Ньурба улууһун Култуураҕа департаменын пуондатын сэбиэдиссэйэ Дора Бурнашева, СӨ үтүөлээх артыыһа Петр Винокуров, бэрэссэдээтэлинэн СӨ норуодунай артыыһа Борис Борисов уонна Маргарита Борисова үлэлээтилэр. Күрэс 2 түһүмэҕинэн буолла. Маҥнайгы түһүмэххэ кыттааччы Маргарита Борисова оонньообут оруолларыгар моно-испэктээк, онтон иккис түһүмэххэ бэйэтэ көҥүл тиэмэҕэ испэктээкилтэн быһа тардан көрдөрүөхтээх диэн ирдэбиллээх буолла.
Бииртэн биир талаан, сонунтан сонун туруоруулар, уот-күөс, тыас-уус өттүнэн да киэргэтиллибит бэрт үчүгэй туруоруулары, оруоллары көрөн, көрөөччүлэр да, дьүүллүүр сүбэ да астынна.
Түһүмэх икки ардыгар олус долгутуулаах тэрээһин — Дьиикимдэ норуот айымньытын дьиэтигэр Маргарита Борисова аатын иҥэрии буолла. Бииргэ улааппыт, үөрэммит, үлэлээбит табаарыстара, кэллиэгэлэрэ, биир дойдулаахтара Маргарита Михайловнаны убаастыылларын, сыаналыылларын этэн-тыынан эҕэрдэлээтилэр.
Онон, Дьиикимдэ олохтоохторо бука бары саба түһэн өрөмүөннээбит, саҥалыы тыыннаах дьиэлэрэ Маргарита Михайловна Борисова аатынан «Утум» норуот айымньытын дьиэтэ диэн бу күнтэн ыла сүрэхтэннэ.
Маны сэргэ, Дьиикимдэ дьоҕурдаах дьоно Маргарита Борисова уобарастарын мэтириэт гынан ойуулаан, быыстапка үөрүүлээх арыллыыта буолла.
Бэстибээли «Я-ваш конферансье» күрэс кыайыылааҕа, «Туой Хайа 2023» «Зажигательное исполнение», «Лучший ведущий Нюрбинского района» анал ааттар хаһаайыннара Егор Михайлов иилээн-саҕалаан ыытта.
Бэстибээл түмүгүнэн Ньурбатааҕы судаарыстыбыннай тыйаатыр анал бириистэрэ Ньурбачаантан Татьяна Саввиноваҕа уонна Дьокуускайтан Марфа Куличкинаҕа туттарылыннылар.
«Бастыҥ дьахтар оруола» анал аат Хорулаттан Наталья Степановаҕа, «Көрөөччү биһирэбилэ» анал аат Үөдэй нэһилиэгиттэн Марфа Федороваҕа, Маргарита Борисова анал бирииһэ Дьиикимдэттэн Анна Чарпыковаҕа туттарылыннылар.
3 истиэпэннээх үктэл уонна 5000 сэртипикээт — Үөһээ Бүлүү Боотулуутуттан Марианна Лазареваҕа, 2 истиэпэннээх үктэл уонна 5000 сэртипикээт — Үөһээ Бүлүү улууһун Мэйик нэһилиэгиттэн Ньургууна Чириковаҕа, 1 истиэпэннээх үктэл уонна 10000 сэртипикээт — Ньурба оройуонун Чаппандатыттан Саргылана Семеноваҕа, 3 истиэпэннээх үрдэл уонна 15000 сэртипикээт — Үөһээ Бүлүү Ороһутуттан Екатерина Туралысоваҕа, 2 истиэпэннээх үрдэл уонна 20000 сэртипикээт — Ньурба куоратыттан Клара Петроваҕа, 1 истиэпэннээх үрдэл уонна 30000 сэртипикээт — Дьокуускай куораттан Розалия Львоваҕа туттарылыннылар.
Кылаан кыайыылааҕынан Ньурба улууһун Чуукаар нэһилиэгиттэн Надежда Казакова буолла. Киниэхэ 50000 суумалаах сэртипикээт, ону таһынан Дьиикимдэ эр бэртэрэ бултаабыт, 16 үйэтээҥҥи истиилинэн 6 киистэн тигиллибит киис бэргэһэ туттарылынна.
Кыттааччыларга, тэрийээччилэргэ, тыйаатыры сэҥээрээччилэргэ уруй-айхал буоллун!
Ньурба оройуонун Култуураҕа департамена
Төрөөбүт күҥҥүнэн, Дьокуускай! Дьокуускай -- биһиги өрөспүүбүлүкэбит тэбэр сүрэҕэ, манна устуоруйа уонна аныгы кэм, үгэстэр…
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…