«Диодорова. Против течения» — киһини долгутар киинэ

Дьокуускайга «Диодорова. Против течения» киинэни аан бастаан сабыылаах көрдөрүү буолла.

Саалаҕа киинэҕэ уһуллубут, устубут, Диодоровтар билэр дьонноро, суруналыыстар, блогердар муһуннулар.

— Настялыын өртөн ыла билсэбит. Москваҕа биир оройуоҥҥа олорбуппут. Спортивнай карьерабыт биир кэмҥэ салҕаммыта. Настя — байыас, ону бэркэ билэбит. Спортсмен олоҕо чэпчэки буолбатах. Кини тугу тулуйарын, хайдах быһаарынарын үгүс дьон билбэт. Бу барыбытыгар суолталаах киинэ. Онон бүгүн киинэни көрөрбүн тэһийбэккэ күүтэбин, — диэн норуот дьокутаата Георгий Балакшин эттэ уонна Настяҕа сибэкки дьөрбөтүн туттарда.

— Барыгытын саҥа киинэни көрөрбүтүнэн эҕэрдэлиибит. Сүүрүгү утары устар куруук ыарахан. Ол эрэн Диодоровтар сүүрүк утары баран, кыайбыттара. Настя дьиэ кэргэнин өйөбүлэ суох, үрдэлгэ тахсыа этэ дуо? Онон төрөппүттэригэр махтанабыт. Бу киинэ элбэх дьоҥҥо көмөлөһүө диэн эрэнэбин, — диэн норуот дьокутаата Алена Атласова бэлиэтээтэ.

— Тыһыынчанан дьоҥҥо Настя дьулуур, тулуур, эр санаа, олоххо таптал холобура буолар. Оттон режиссер Сандал Баишевка киинэни устубута улахан эппиэтинэс буолар. Биһиги бары киэн туттар кыыспыт туһунан киинэ устар санаатын олоххо киллэрбитигэр махтанабыт. Бу киинэни көрбүт эрэ киһи долгуйар, толкуйга түһэр, олоххо тардыһыыта күүһүрэр, — диэн култуура миниистирэ Афанасий Ноев эттэ.

— Мин Москваҕа кэлэ-бара Диодоровтарга түһэр, сылдьар этим. Үгүс спортсменнарга кинилэр көмөлөспүттэрэ элбэх. Биһиги кинилэргэ махталбыт улахан. Сахалар Настянан киэн туттабыт, — диэн успуорт миниистирэ Леонид Спиридонов эттэ.

Оттон режиссер Сандал Баишев Диодоровтарга уонна үлэлээбит хамаандатыгар махтанна. »Мин тугу этиэхпин баҕарбыппын барытын киинэттэн көрүөххүт» диэн эттэ.

Киинэ бүппүтүн кэннэ, ытыс тыаһа уҕараабата, көрөөччүлэр тарҕаһыахтарын баҕарбакка, тоҕуоруһан туран, Диодоровтары ытыс тыаһынан эҕэрдэлээтилэр. Дьон тарҕаһыахтарын баҕарбакка, хаартыкаҕа түстүлэр, Диодоровтары сибэкки дьөрбөтүнэн «көмтүлэр». Үгүстэр харахтарын уутун сотто олорбуттара. Онон, дууһа кылын таарыйар, киһини долгутар киинэ буолбут.

«Диодорова. Против течения» киинэ муус устар 17 күнүттэн бары киинэ тыйаатырдарыгар көстүөҕэ.