“Диодорова. Против течения” киинэ 22 мөл. солк. хомуйан, Арассыыйа прокатыгар 3 миэстэ иһигэр киирдэ

ЕАИС дааннайынан Арассыыйа паралимпиеһын, сайыҥҥы Паралимпийскай оонньуулар үрүҥ көмүс призердара, аан дойду уонна Европа чөмпүйүөнэ, РФ успуорка үтүөлээх маастара Анастасия Диодорова туһунан спортивнай байопик хомуура 22 474 572 солк. буолла.

Бастакы өрөбүллэргэ киинэ 17 353 252 солкуобайы хомуйбута уонна өрөбүллэр түмүктэринэн Арассыыйа прокатыгар үс бастыҥ иһигэр киирбитэ. Бастакы миэстэҕэ “Кракен” блокбастер, иккискэ “Батя 2: Дед” киинэ сылдьаллар. Саха киинэтигэр сааланы толору кэриэтэ киһи кэлэринэн уратылаах – ортотунан хас көрдөрүү ахсын 82 киһи сылдьар. 2025 сыллаахха биир өрөбүллэргэ 10 бастыҥ иһигэр киирбит киинэ дьон сылдьыытыгар маннык үрдүк көрдөрүүнү ситиһэ илигэ, диэн иһитиннэрэр “Кинопоиск” сервис.