«Диодорова. Против течения» киинэ «Будем жить» бэстибээлгэ бэлиэтэннэ

«Будем жить» XIV Москватааҕы норуоттар икки ардыларынааҕы киинэ бэстибээлигэр «Диодорова. Против течения» киинэ бэстибээлин бэрэсидьиэнин анал бириэмийэтин тутта. 

Быйыл бу бэстибээл сүрүн тиэмэтэ Кыайыы 80 сылыгар ананна. Олоххо тардыһыылаах, ураты устуоруйалаах, дьылҕалаах дьоруойдардаах киинэлэр биһирэннилэр.

«Диодорова. Против течения» киинэ быйыл муус устар ыйга киэҥ экрааҥҥа тахсыбыта уонна балаҕан ыйыгар диэри 50 мөлүйүөн солкуобайы хомуйда. Киинэҕэ Паралимпийскай оонньуулар үрүҥ көмүс призердара, аан дойду, Европа чөмпүйүөнэ Анастасия Диодорова туһунан уһуллубута. Киинэ режиссера — Сандал Баишев.

«Будем жить» киинэ бэстибээлин Гран-при бирииһин режиссер Андрей Зайцев  «Двое в одной жизни, не считая собаки» киинэтэ ылла. Бу бэстибээлгэ Арассыыйаҕа уһуллубут киинэлэр кытталлар.

Ол курдук,  Рауль Гейдаров «День рождения Сидни Люмета»,  «Чистый лист», Яна Недзвецкая «Пуанты для моей мамы»  киинэлэр бэлиэтэннилэр.