Дипфейк — оҥоһуу өй күлүктээх өттө өссө кутталлаах

Куйаар ситимэ киириэҕиттэн бэйэтэ да түргэтээбит, ааһа баран уустугурбут олохпут тэтимигэр аны оҥоһуу өй олорсо түстэ. Бырааһынньыгынан эҕэрдэлээн,  күллэрэн-үөрдэн испит оҥоһуу өйбүт, хомойуох иһин күлүктээх өттүлээҕэ эмиэ көстөн эрэр.

Ол курдук дипфейк диэн өҥөһуу өй көмөтүнэн киһи дьүһүнүн, куолаһын үүт үкчү үтүгүннэрэн, хамсатан, саҥарбатаҕын да саҥардар, эппэтэҕин да этитэр видео уонна аудиозапистар тарҕанар буоллулар. Киһи аньыыргыах, тыа кыылларынан киһини тырыта тыыттараллар, дьиэлэригэр сүүрдэн киллэрэллэр. Эбэтэр биллэр ырыаһытынан хаһан да ыллаабатах ырыатын ыллаталлар эбэтэр салайааччы куолаһын үтүгүннэрэн түөкүттэргэ киирэн биэрэр сорудаҕы толортороллор. Онон куйаар ситимигэр бэйэбит да, Арассыыйа да салайааччылара, биллэр дьоннорбут хайдах эрэ тосту-туора саҥаран барбыт видеоларын соһуйа-өмүрэ көрүмэҥ, ыраас мууска ылынымаҥ, социальнай ситимнэринэн ыытыһымаҥ. Бу буолуо куһаҕан негативнай информацияттан бэйэ бэйэни харыстаһыыбыт, көмөлөсүһүүбүт.

Маны хайдах оҥороллоруй?

Нейроннай ситим киһи хаартыскаларын уонна видеоларын (төһөнөн элбэх, соччонон куһаҕан)  үөрэтэр уонна ылбыт дааннайдары туһанан кини хаартыскаларынан эбэтэр куолаһынан саҥа, синтезтаммыт барыйаанын оҥорор.

Дипфейки хайдах дьиҥнээхтэн араарыахха сөбүй?

Видео буоллаҕына, онно көстөр киһи хаста чыпчылыйарын, кураанаҕынан көрөрүн, саҥатын кытта айаҕа хамсыыра төһө сөп түбэһэрин кэтээн көрүҥ.

Чахчы киһи саҥарар дуу эбэтэр биир күдьүс роботтуу, үксүн түргэн, саҥа иһиллэр дуу, ону араарар буолуҥ.

Видео бысталанан, кумаланан ылар, эмискэ сырдыыр-хараҥарар буоллаҕына – бу эмиэ дипфейк.

Билэр-билбэт дьонуҥ, аймахтарыҥ, салайааччыҥ, судаарыстыбаннай тэрилтэ үлэһитин аатыттан тугу эрэ оҥор эбэтэр харчыта ыыта оҕус диэн эттэхтэринэ, бастаан бэйэлэригэр эрийэн бэрэбиэркэлээн көр.

Официальнай да курдук көстөр сурукка манан киир диэн сигэ ыыппыт буоллахтарына, туттун, өмүрэх курдук баттыы охсума.