Дириҥ агро-оскуолатыгар сэргэх көрсүһүү

Бэҕэһээ, олунньу 10 күнүгэр, Чурапчы улууһугар И. Е. Федосеев — Доосо аатынан Дириҥ орто агро-оскуолатыгар Москваттан кэлбит  “Просвещение” ААУо, “Народное образование” педагогическай сурунаал, Арассыыйа агро-оскуолаларын ассоциятыттан кэлбит дэлэгээссийэлэр  ыалдьыттаатылар.

Ол курдук, көрсүһүүгэ “Просвещение” ААУо генеральнай дириэктэрин солбуйааччы Анастасия Зырянова, тэрилтэ социальнай уонна гуманитарнай бырайыактарга дириэктэрэ Алексей Благинин, “Просвещение” кыһата” АУо дириэксийэтин кэлимсэ бородуукталары айан таһаарыыга дириэксийэтин салайааччыта Борис Соловьев, “Народное образование” сурунаал кылаабынай эрэдээктэрэ Елена Шишмакова, Арассыыйа Агро-оскуолаларын ассоциациятын салайааччыта Ольга Илларионова, С.Н.Донской-II аатынан Үөрэҕи сайыннарыыга уонна квалификацияны үрдэтиигэ институтун дириэктэрин э.т. Юрий Шишигин кытыннылар.

Кинилэр бастаан Саха сиригэр агро-үөрэхтээһин туһунан Федерация Сэбиэтин аграрнай уонна ас-үөл бэлиитикэтигэр  уонна айылҕаны туһаныыга кэмитиэтин бэрэссэдээтэлин солбуйааччы Е.А.Борисов ыыппыт киэҥ ыҥырыылаах мунньаҕар кытыннылар.

Москваттан кэлбит ыалдьыттар өрөспүүбүлүкэ араас муннуктарыттан мустан 200 оҕо үөрэнэр Дириҥ агро-оскуолатын үөрэнээччилэрин кытта ирэ-хоро кэпсэттилэр, оҕолортон интэриэһиргээбит тиэмэлэринэн ыйыталастылар.  Биһиги  оскуолабыт ыытар киэҥ хайысхалаах үлэтин, баазатын билистилэр.

Санаттахха, Дьокуускайга олунньу 9 күнүттэн 12 күнүгэр диэри “АПК каадырдара” (“Кадры в АПК”) нацбырайыак чэрчитинэн наука, үөрэх уонна оҥорон таһаарыы хайдах ситимнээхтик үлэлииллэрин бу үөһээ ааттаммыт тэрилтэлэртэн кэлбит салайааччылар билсэллэр. Кинилэр Саха сирин агро-үөрэхтээһиҥҥэ уопутун биһирээтилэр киэҥник тарҕатыахтара. Бу тэрээһиннэри Феодосия Габышева уонна СӨ тыатын хаһаайыстыбатын уонна ас-үөл бэлиитикэтин миниистирин солбуйааччы Сахаяна Павлова салайаллар.

Егор Адамов, И. Е. Федосеев — Доосо аатынан Дириҥ орто агро-оскуолатын дириэктэрэ.

Хаартыскалары: оскуола салалтата ыытта.