Дириҥнэр госпиталларга сытар байыастарга мэлдьи көмөлөһөллөр

Чурапчы улууһун Дириҥ олохтоохторо Санкт-Петербург госпиталларыгар эмтэнэр уолаттарга тиһиктээхтик көмөлөһөллөр.

Олохтоохтор бэйэлэрэ көҕүлээннэр, нэһилиэк дьаһалтатын үлэһиттэрэ Дьокуускайга киирэннэр, 350 кг кэриҥэ таһаҕаһы волонтер Светлана уонна Владислав Диодоровтарга-Лаврентьевтарга туттардылар.

«Бүгүн Чурапчы улууһуттан көмөлөрүн аҕаллылар. Дириҥ олохтоохторо мэлдьи көмөлөһөллөр. Сотору кэминэн бу астары илдьэ госпиталларга айанныахпыт. Нэһилиэк олохтоохторо бүгүн булт, ынах, убаһа эттэрин, балыгы, отону, буотараҕы хомуйан ыыттылар. Баһылык эппитинэн, уопсайа 17 миэстэ, 20-22 киилэ гуманитарнай көмө кэллэ. Уолаттарбытыгар мэлдьи көмөлөһөр, күүс буолар Дириҥ олохтоохторугар барҕа махталбын тиэрдэбин.  Уолаттар дойдуларын аһын аһаан күүс эбиниэхтэрэ, сэргэхсийиэхтэрэ. Түгэнинэн туһанан бу курдук ис дууһаларыттан, бэйэлэрэ өрүү өйөбүл, көмө буолар дьоммутугар махталбытын тиэрдэбит!», — диэн волонтер Светлана Диодорова-Лаврентьева этэр.