Диспетчер массыына аҕалтараары түөкүннэргэ 1,7 мөл. солк. ыыппыт

Өрөспүүбүлүкэ полициятын отделларыгар түөкүннэргэ албыннаппыт биэс Саха сирин олохтооҕо тыллаабыт.  Эмсэҕэлээччилэр уопсайа 3 мөл. солк. кэриҥэ харчыларыттан маппыттар.

Бу туһунан Саха сиринээҕи ИДьМ пресс-сулууспата иһитиннэрэр. Ордук улахан сууманы 32 саастаах диспетчер сүтэрбит. Кинини массыына аҕалабыт диэн албыннаан түөкүннэр 1,7 мөл. солк. уорбуттар.

Оттон Нерюнгри улууһуттан 45 саастаах харабыл сымыйа трейдердэр этиилэригэр сөбүлэһэн, түөкүннэргэ 600 тыһ. солк. кэриҥэ харчыны«инвестициялаабыт».

Дьокуускайдааҕы устудьуоҥҥа түөкүннэр страховой хампаанньа үлэһиттэрэбит диэн кубулунан, 250 тыһ.солк. албыннаан ылбыттар.

Дьокуускайтан 26 саастаах инженер сымыйа суотабай оператор тылларыгар итэҕэйэн, түөкүннэр счеттарыгар  мунньуммут уонна кирэдьииккэ ылбыт харчытын, уопсайа 275 тыһ. солк. ыыппыт.

Оттон 60 саастаах учууталы түөкүннэр «Водоканал» үлэһиттэрэбит диэн албыннаабыттар. Түмүгэр 130 тыһ.солк. тахса  харчы түөкүннэр сиэптэригэр киирбит.