Дмитрий Чернышенко Ил Дарханныын үөрэх, успуорт уонна туризм сайдыытын дьүүллэстилэр

Арассыыйа бырабыыталыстыбатын бэрэссэдээтэлин солбуйааччы Дмитрий Чернышенко уонна Ил Дархан Айсен Николаев Саха сиригэр наука уонна үөрэхтээһин сайдыытын, эрэгийиэн туризмҥа кыахтарын олоххо киллэрии уонна успуорт боппуруостарын дьүүллэстилэр.

Көрсүһүү от ыйын 6 күнүгэр вице-премьер Дьокуускайга оробуочай сырыытын чэрчитинэн ыытылынна.

«Саха Өрөспүүбүлүкэтэ Арассыыйа биир саамай улахан, дьикти айылҕалаах уонна баай кыахтаах эрэгийиэнэ. Манна инновация бырайыактара үксүгэр наука чинчийиилэрин эйгэтин биир кэлим сайыннарыы көмөтүнэн олоххо көхтөөхтүк киллэриллэллэр. Эрэгийиэҥҥэ «Хотугу сир» аан дойду таһымнаах НОЦ үлэлиир: 2,5 сыл иһигэр НОЦ резиденнэрэ 100-тэн тахса технологияны туһаҕа таһаардылар, 300 кэриҥэ арыйыыны патеннаатылар. «Наука уонна университеттар» национальнай бырайыак чэрчитинэн эрэгийиэҥҥэ ыччат 10 научнай лабораторията аһылынна», -– диэн бырабыыталыстыба бэрэссэдээтэлин солбуйааччы бэлиэтээн эттэ.
«Саха сирэ -– экэниэмикэ өттүнэн тэтимнээхтик сайдар дойду эрэгийиэннэриттэн биирдэстэрэ. Биһиги кэккэ хайысхаларга инники таҕыстыбыт. Алмааһы хостооһуҥҥа мэлдьи инникибит , көмүһү хостооһуҥҥа билигин дойдуга —  иккиспит, чоҕу хостооһуҥҥа — үһүспүт, ньиэби хостооһуҥҥа — бэһиспит. Онуоха айар индустрия, креативнай экэниэмикэ сайдыытыгар эмиэ болҕомтону уурабыт. Саха сирин киинэтэ хайыы үйэ Саха сирин уонна Арассыыйа тас өттүгэр биллэр», -– диэн Айсен Николаев бэлиэтээн эттэ.
Ил Дархан Дмитрий Чернышенкоҕа Дьокуускайга «Азия оҕолоро» оонньуулары ыытыыны өйөөһүн иһин махтанна. РФ Наукаҕа уонна үрдүк үөрэхтээһиҥҥэ министиэристибэтэ күрэхтэһиилэр кыттааччылара түспүт ХИФУ уопсай дьилэрин өрөмүөннээһиҥҥэ үбү биэрбитэ. Ил Дархан өрөспүүбүлүкэ улуустарыгар 17 ИТ-киини тэрийии үөрүйэҕин үллэһиннэ. Бу кииннэр көмөлөрүнэн дьон улуустарга олорон, ыраахтан Дьокуускайга үлэлиир кыахтаналлар.

Вице-премьер Айсен Николаевы «Регион для молодых» куонкуруска кыайыынан эҕэрдэлээтэ. Субъект киллэрбит бырагыраамата кыайыылаахтар ТОП-10 киирсэн, 128 мөлүйүөн суумалаах өйөбүлү ылбыта.
«Федеральнай бырабыыталыстыба өйөбүлүнэн сотору Дьокуускайга Ыччат киинэ баар буолуоҕа. Киин үүнэр көлүөнэни патриоттуу тыыҥҥа иитиигэ өссө улахан болҕомтону уурарга уонна бастыҥ ситиһиилэри ыларга көмөлөһүөҕэ», -– диэтэ Айсен Николаев.
Көрсүһүүгэ ону сэргэ эрэгийиэҥҥэ успуорт эйгэтин сайдыытын боппуруостарын дьүүллэстилэр.

«Судаарыстыба баһылыга туруорбут национальнай соруктарыттан биирдэстэрэ -– нэһилиэнньэ доруобуйатын бөҕөргөтүү. 2030 сылга Арассыыйа олохтоохторун 70% физкультуранан тиһигин быспакка дьарыктаныахтаах. Эрэгийиэн успуорт инфраструктуратын сайыннарарга хас да сыл устата федеральнай бүддьүөттэн 1,1 миллиартан тахса үбү «Успуорт -– олох нуормата» уонна «Биисинэс-спринт» (Мин успуорду талабын) федеральнай бырайыактарынан ылыаҕа», -– диэн вице-премьер эттэ. Кини субъекка успуорт эйгэтэ тэтимнээхтик сайдарын бэлиэтээтэ.
«Дьокуускай успуорт киэҥ хабааннаах күрэхтэһиилэрин дьоһуннаахтык уонна саамай үрдүк таһымҥа ыыппыта. «Азия оҕолоро» — биһиги брендмит, онньуулары бастакы бэрэсидьиэммит Михаил Николав олимпийскай хамсааһын 100 сылынан саҕалаабыта. Билигин оонньуулар — доҕордоһуу, успуорт кырдьыктаах киирсиилэрэ. Бүгүн оонньуулар үчүгэй таһымҥа түмүктэнэллэригэр эрэнэбин. Оонньуулары өссө инники күөҥҥэ таһаарар туһугар салгыы үлэлиэхпит», -– диэтэ Айсен Николаев.
Өрүттэр ону таһынан Саха сиригэр туризм сайдыытын дьүүллэстилэр, Дмитрий Чернышенкоҕа эрэгийиэн туризмҥа кыахтарын билиһиннэрдилэр.