Дмитрий Егоров: Байыаннай сулууспалаах пааспарынан – көмө уонна өйөбүл

Ньурба улууһун Түмүк нэһилиэгин баһылыга Дмитрий Егоров байыаннай эпэрээссийэҕэ кытта сылдьар түөрт байыаннай сулууспалаах уолга, кинилэр дьиэ кэргэттэригэр олохтоох дьаһалта, нэһилиэк уопсастыбаннаһын, ыччаттарын өттүлэриттэн көмө тэриллэ, оҥоһулла турарын кэпсээтэ.

— Биһиги нэһилиэктэн төрүттээх түөрт уол байыаннай дьайыыга кытта барбыта. Олортон үһэ бааһырыы ылан, Приморьеҕа ВВК көрдөрүнэллэр. Учуутал уолбут байыаннай дьайыы сиригэр сылдьар.
Ааспыт күһүҥҥүттэн ыла олохтоох дьаһалта өттүттэн байыаннай сулууспалаахтарбыт дьиэ кэргэттэригэр көмө тэрээһиннээхтик ыытыллар. Ол курдук, кинилэр от, мас тиэйтэрэллэригэр тыраахтар өҥөтүн босхо көрүү олоххо киирбитэ. Иһэр уу мууһун ылыы, тиэргэнтэн хаар күрдьүүтэ, оттук маһы хайытыы, саһааннааһын курдук, туох наадатынан көрөн көмөлөһөн, байыастарбыт төрөппүттэрин, дьиэ кэргэттэрин кытта ыкса сибээскэ олоробут. Эдэр ыччат управлениета күһүн улуустан психологтары таһааран уолаттарбыт дьоннорун, төрөппүттэрин, кэргэттэрин кытта уйулҕалара бигэ туруктаах буолуутугар көмөлөөх кэпсэтии ыыппыттара.

Байыаннай сулууспалаах пааспара диэни оҥордубут. Ол пааспарынан буойуттарбыт дьиэ кэргэттэрэ уопсастыбаннай тырааныспарынан айаннара, култуура тэрээһиннэригэр сылдьыылара, оҕолоро оҕо саадыгар сылдьыылара, оскуолаҕа аһыыллара босхо, балыыһаҕа уочарата суох көрдөрүнэллэр. Ити курдук туох наадатын этэллэринэн оҥорорго кыһаллабыт.