Дмитрий Егоров өйдөбүнньүк малларын Чуумпу акыйааннааҕы байыаннай-устуоруйа мусуойугар туттардылар

РФ уонна Донецкай Норуодунай Өрөспүүбүлүкэ Дьоруойа, “Сунтаар” позывнойдаах Дмитрий Николаевич Егоров уордьанын, кинигэлэрин,хаартыскаларын, байыаннай таҥаһын уонна илиинэн оҥоһуллубут мас барельебы Чуумпу акыйааннааҕы байыаннай-устуоруйа мусуойугар туттардылар.

Уһук Илиҥҥи уокурукка Саха сирин бастайааннай бэрэстэбиитэлистибэтигэр иһитиннэрбиттэринэн, бу өйдөбүнньүктэри Арассыыйа Дьоруойун аймахтара уонна чугас дьоно хомуйбуттар.

Тэрээһин  2023 сыллаахха ДНР Новомайорскай нэһилиэнньэлээх пуунун таһыгар өстөөҕү утары тэҥэ суох киирсиигэ кыргыспыт Дмитрий Егоров төрөөбүтэ 50 сылыгар ананна. Муора пехотинеһа  кыргыһыы кэмигэр ВСУ штурмовой бөлөҕүн сорҕотун  суох оҥорон, утарылаһааччы чугуйан биэрбитэ. Дмитрий манна ылбыт улахан  бааһыттан өлбүтэ. Рядовой Дмитрий Егоровка  байыаннай иэһин толороругар  дьоруойдуу быһыытын, хорсунун иһин өлбүтүн кэннэ РФ Дьоруойун аата иҥэриллибитэ.

Чуумпу акыйааннааҕы мусуой сэбиэдиссэйэ Евгений Журавлев эппитинэн, билигин  мусуойга Москваҕа “Патриот” пааркаҕа туруоруллуохтаах экспозициялары хомуйаллар.

«Саха сирин Дьоруой уола Дмитрий Егоров туһунан өйдөбүнньүн Санкт Петербурга Улуу Петр аатынан Киин байыаннай-муора мусуойугар үйэтиллиэҕэ, — диэтэ Евгений Журавлев.

Долгутуулаах түгэн кыттыылаахтара, бастайааннай бэрэстэбиитэлистибэ үлэһиттэрэ, устудьуоннар уонна буойун биир дойдулаахтара муора пехотатын 155-с биригээдэтин Дьоруойдар аллеяларыгар Дмитрий Егоров бюһугар тыыннаах сибэккилэри уурдулар.