Дмитрий Федотовка аналлаах Оһуокай күрэҕэ

Дьокуускайга Арчы дьиэтигэр кулун тутар 27 күнүгэр СӨ култууратын үтүөлээх үлэһитэ, СӨ үөрэҕириитин уонна култууратын туйгуна, Үөһээ Бүлүү улууһун бочуоттаах олохтооҕо Дмитрий Яковлевич Федотов төрөөбүтэ 90 сылыгар оҕолорго, ыччакка аналлаах өрөспүүбүлүкэтээҕи күрэх  үрдүк тэрээһиннээхтик буолан ааста.

Дмитрий Яковлевич өр сылларга Оһуокай түмсүүтүн салайааччытынан олоҕун анаабыт улууһугар Үөһээ Бүлүүгэ үрдүк таһаарыылаахтык үлэлээбитэ. Кини Саха сиригэр оҕо Оһуокайын оскуолатын төрүттээбит төһүү киһибит буолар. Ол иһин Үөһээ Бүлүүтээҕи МТ дьаһалтата Д.Я. Федотов төрөөбүтэ 90 сылынан 10 сааһыттан саҕалаан 25 саастаах ыччаттарга анаан үс түһүмэхтээх күрэҕи былааннаабыта олоххо киирдэ. Тэрээһини Култуура уонна духуобунай сайдыы департамена уонна Норуот айымньытын киинэ улуус дьаһалтата  тэрийэн ыыттылар. Манна эбэн эттэххэ,Үөһээ Бүлүү улууһугар оҕолору оһуокайга үөрэтиигэ биир бастыҥ үлэлээҕинэн биллэр. Дмитрий Яковлевич оҕолору оһуокайга үөрэтэр үтүө үгэһэ билигин да салҕанан барар. СӨ култууратын үтүөлээх үлэһитэ, Дархан этээччи Айталина Мойтохонова-Сахаайта музыкальнай оскуолаҕа диэириэктэринэн үлэлии олорон, оҕолорго оһуокайга, олоҥхоҕо үөрэтэргэ анаан федеральнай бырайыагы көмүскээн, билигин Кэнтиккэ ити бырайыак олоххо киирэн үлэлии турар. Аны өрөспүүбүлүкэ оҕолорун барыларын түмэн үһүс сылын Күн Оһуокайа телевизионнай күрэх бырайыагын хоннохтоохтук үлэлэтэ сылдьар. Итини кытта билигин төрөөбүт улууһугар Култуура уонна духуобунай сайдыы департаменын начаалынньыгынан үлэлии сылдьар. Кини үөрэнээччилэрэ Марианна Хобусарова, Хаар Семенова, о.д.а. учууталларын утумнаан, элбэх оҕону үөрэтэллэр. Күрэххэ 47 оҕо Бүлүү, Амма, Мэҥэ Хаҥалас, Хаҥалас, Горнай, Таатта улуустарыттан, Дьокуускай куораттан кытыннылар.

Күрэҕи үс түһүмэҕинэн сыаналаатыбыт. Бөлөх ахсын үс үрдэл, үс үктэл уонна анал ааттар туттарылыннылар. Дмитрий Яковлевич кыыһа Ольга Дмитриевна кыайыылаахтарга харчынан уонна сыаналаах сэртипикээттэри туттарда. Аҕатын Дмитрий Яковлевич аатыгар ыытыллыбыт күрэх сыалын сиппитин бэлиэтээтэ. Оҕолор бу ситиһиилэринэн уоскуйбакка учууталларын утумнаан, Дархан этээччи Айталина Мойтохонова-Сахаайта курдук олохторун саха култууратыгар, чуолаан оһуокайга аныылларыгар баҕарда.

Тэрийээччилэр тэрээһин хас биирдии оҕоҕо умнуллубаттык ааһарын курдук, элбэх тэрилтэлэри, биирдиилээн этээччилэри кытары үлэлэһэн, элбэх бирииһи туруорбуттар. Күрэҕи  улуустааҕы Оһуокай уопсастыбатын бэрэссэдээтэлэ Людмила Гурьева тэрээһиннэхтик ыытта. Тойон сүбэҕэ Оһуокай түмсүүтүн Дархан, үтүөлэээх этээччилэрэ кыттыспыттара эмиэ хайҕаллаах. Ол курдук, Бүлүү Оһуокай уопсастыбатын бэрэссэдээтэлэ, Олоҥхо дьиэтин исписэлииһэ С. Иванова, Мэҥэ Хаҥалас култуураҕа сүрүннүүр исписэлииһэ, Дархан этээччи С.Иванов о.д.а. үлэлээтилэр.

10-14 саастаахтарга Кылаан ааты Ньурба улууһуттан Камелия Яковлева, 15-17 саастаахтарга Кылаан ааты Үөһээ Бүлүү улууһуттан Хоро орто оскуолатын онус кылааһын үөрэнээччитэ Эрика Базюк, 18-25 саастаахтарга Айыы Кыһатын 11 кылааһын үөрэнээччитэ, Хаҥаластан кыттыбыт Эрик Егоров буоллулар. Манна «Күн Оһуокайа бырайыакка кыттыбыт элбэх оҕо көхтөөхтүк кытынна. СӨ үтүөлээх этээччилэрэ Марианна Хобусарова, Розанна Герасимова, Мария Иванова, Дархан этээччи Виталий Никифоров үөрэнээччилэрэ кыттыннылар. Кинилэр бэйэлэрэ этээччи эрэ быһыытынан буолбакка, оҕолору кытары утумнаахтык үлэлии сылдьалларын көрдөрдүлэр. Бастакы үрдэл ааты ылбыт Тааттаттан Алена Колодезникова, Бүлүүттэн Сайыына Шамаева түһүлгэни кыайа хото туттулар.

Кыттыбыт оҕолор бары талааннаахтарын, төрөөбүт тылларынан холкутук тутатына дьүһүйэн этэллэринэн кыахтаахтарын көрдөрдүлэр. Күрэх аһыллыытыгар кэлэн тыл эппит Ил Түмэн бэрэссэдээтэлин бастакы солбуйааччы Александр Жирков оһуокай этэр оҕолор төрөөбүт тылларынан тутатына хоһуйалларынан, атыттардааҕар ураты кыахтаахтарын чорботон бэлиэтээбитэ.

Дьэ, ити курдук, Оһуокай сайдыытыгар сыратын уурбут энтузиаст, бастакы Оһуокай оскуолатын Үөһээ Бүлүүгэ тэрийбит, биһиги бары сүгүрүйэр киһибит Д.Я. Федотов аатыгар ананан ыытыллыбыт күрэх сыалын ситтэ, үрдүк таһымнаахтык барда.

Марта Николаева