Дмитрий Габышев: «Олохтоохтор кыайыы буоларыгар, уолаттар этэҥҥэ эргиллэн кэлэллэригэр эрэллэрэ улахан”

Өлүөхүмэ улууһун Троицкай нэһилиэгин баһылыга Дмитрий Габышев байыаннай сулууспалаахтар уоппускаҕа кэлиилэрин хайдах көрсөллөрүн, туох көмө, өйөбүл баарын туһунан хаһыат саайтын ааҕааччыларыгар анаан кэпсээтэ.

— Биһиги байыаннай эпэрээссийэ кытта сылдьар уолаттарбыт уоппускаҕа кэлиилэрин, үгэс курдук, Өлүөхүмэ куоратын аэропордугар нэһилиэк дьаһалтата, төрөппүттэрэ, чугас дьоно, доҕотторо, уопсайа, уонча-сүүрбэччэ буолан, Арассыыйа, Саха сирин былаахтарын, араас өҥнөөх элбэх саардары күөрэччи көтөҕөн, үөрэн-көтөн көрсөбүт.

Сынньана түспүттэрин кэннэ сарсыныгар нэһилиэк дьаһалтатын дьиэтигэр эбэтэр «Кыталык» култуура дьиэтигэр кинилэри кытта истиҥ, иһирэх быһыыга-майгыга анаан-минээн ирэ-хоро чэйдээһиннээх, күө-дьаа сэһэргэһиилээх нэһилиэнньэни кытта көрсүһүүлэри тэрийэбит. Холобура, олунньу 23 күнүгэр уоппускаҕа сылдьар буойуммутугар Махтал суругу кытта, дьаһалта уонна кулууп ааттарыттан 10 тыһыынча суумалаах харчынан бэлэх сертификатын туттарбыппыт. Уоппускаҕа кэлбит өссө биир буойуммут дьонугар Дьокуускайга баар, баҕар, манна кэлэ сылдьыаҕа. Ити курдук биһиги нэһилиэктэн ыҥырыллыбыт биэс уолтан үс байыас уоппускаҕа кэлиитин көрүстүбүт. Хомолтолооҕо диэн, ахсынньы 26 күнүгэр былырыын биир уолбутун дойдутугар Троицкайга аҕалан төрөөбүт буоругар туттарбыппыт.

Уолаттарбыт дьиэ кэргэттэригэр тус аадырыстаах көмө, өйөбүл оҥоһулла турар. Тыа сирин кыһалҕата биллэр, оттор мас, хаары ыраастааһын, уо.д.а. Ааспыт сыл бүтүүтэ дьаһалта баһылыгын пуондатыттан буойуттарга биир кэмнээх көмө 20 тыһыынчалыы солкуобай, уопсайа, сүүс тыһыынча солкуобай туттарыллыбыта.

Нэһилиэк байыаннай эпэрээссийэҕэ кыттар байыаннай сулууспалаахтарыгар, кинилэр дьиэ кэргэттэригэр көмөтүн салгыы ыытар, олохтоохтор кыайыы буоларыгар, уолаттар этэҥҥэ эргиллэн кэлэллэригэр эрэллэрэ улахан.