Дмитрий Коркин аатынан турнирга Европа вице-чөмпүйүөнэ кыттыаҕа

Дьокуускайга ыытыллар Дмитрий Коркин аатынан норуоттар икки ардыларынааҕы күрэхтэһиигэ Беларусь сүүмэрдэммит хамаандатын састаабыгар эр дьоҥҥо Европа чөмпүйэнээтин үрүҥ көмүс призера, Европа бастакы күрэхтэһиилэрин кыайыылааҕа Георгий Колиев кэлиэҕэ диэн «Триумф» пресс-сулууспата иһитиннэрэр.

Кинини кытта Беларусь бэрэстэбиитэллэрэ, 2024 сыллааҕы БРИКС оонньууларын призердара Аркадий Погосян уонна Ярослав Ядковский кыттыахтара. Хамаанданы Беларусь Өрөспүүбүлүкэтин үтүөлээх тириэньэрэ, ССРС успуордун маастара Жуматай Шубаев салайан аҕалыа.

Санатан эттэххэ, Дмитрий Коркин аатынан норуоттар икки ардыларынааҕы күрэхтэһии сэтинньи 15-16 күннэригэр «Триумф» успуорт уораҕайыгар ыытыллыаҕа. Бу туһунан Өрөспүүбүлүкэтээҕи сүүмэрдэммит хамаандалары успуорка бэлэмнээһин киинигэр иһитиннэрдилэр.