Дмитрий Коркин аатынан XIV норуоттар икки ардыларынааҕы көҥүл тустууга турнир түмүктэннэ

Дьокуускайга Дмитрий Коркин аатынан XIV норуоттар икки ардыларынааҕы көҥүл тустууга турнир түмүктэннэ.

Улуу тириэньэр аатынан турнир чөмпүйүөннэринэн буоллулар: Рамиз Гамзатов (57 кг), Кежик Монгуш (61 кг), Кежик Чымба (65 кг), Виктор Рассадин (70 кг), Давид Баев (74 кг), Гаджимурад Алихмаев (79 кг), Артур Найфонов (86 кг), Амирхоссейн Физрузпур (92 кг), Шамиль Мусаев (97 кг) уонна Амирреза Масуми (125 кг).

Анал бириис – Үрүҥ көмүс борцовкалар хаһаайыннарынан Виктор Рассадин буолла. Кини бу турнирга 6 кыһыл көмүс мэтээли ылан көрсүһүү рекордун олохтоото.

Ыалдьааччылар икки ардыларыгар ыытыллыбыт бириистээх оонньууга Чурапчыттан ыалдьыттыы кэлбит Мария Лебедева кыайыылааҕынан биллэрилиннэ.

Ил Дархан Айсен Николаев түмүктүүр киирсиилэргэ сылдьыбытын туһунан социальнай ситимнэргэ санаатын үллэһиннэ:

— «Триумфка» бүгүн күүрүү күүһэ сүдү – финалга тахсыбыттар киирсиилэрэ. Тыһыынчанан ыалдьааччылары кытта успуорт өрөгөйүн туоһулара буоллубут! Биһиги уолаттарбыт уһулуччу хапсыһыыны көрдөрдүлэр, өрөспүүбүлүкэбит чиэһинэн таһымнаахтык көмүскээтилэр. Дмитрий Петрович Коркин сахаларга сүдү суолталаах киһи – төрөөбүт сирбит баарын аан дойдуга биллэрбитэ, Саха сиринэн киэн туттууну элбэх көлүөнэҕэ бэлэхтээбитэ. Улуу тириэньэр саҕалаабыт үлэтэ салҕанан бара турар!”