Дмитрий Попов: «Начаалынай байыаннай үөрэхтээһин бырагыраамата ылыллан, ол олоххо киириитигэр ылсыахтара дии саныыбын”

Дойдубут кыраныыссаларын бөҕөргөтүү, Арассыыйаны утары куомуннаспыт арҕааҥы дойдулар уодаһыннаах дьайыыларын, Аҕа дойдуга тирээн турар билиҥҥи уустук кэмҥэ төрөөбүт дойдуга бэриниилээх буолуу тустарынан санааларын үллэстэригэр Чурапчы улууһа МТ улуустааҕы Сэбиэтин дьокутаата Дмитрий Попов биир сүрүн боппуруоска күүстээх үлэ барыахтааҕын тоһоҕолоон бэлиэтиир.

Ол үлэ – үүнэр сүһүөх көлүөнэлэри дойдуга бэриниилээх сыһыаҥҥа, төрөөбүт төрүт түөлбэҕэ, аймах-билэ дьоҥҥо амарах сыһыан, таптал, норуот сиэригэр-туомугар ытыктабыл тыыныгар уһуйар, такайар улахан сыралаах үлэ. “Онуоха начаалынай байыаннай үөрэхтээһин бырагыраамата ылыллан, ол олоххо киириитигэр ылсыахтара дии саныыбын”, — диир кини.
— Аҕа дойду сэриитин кэнниттэн 1950-60-70-80 сылларга оскуолаҕа оҕону үлэҕэ итиэннэ байыаннай дьыалаҕа үөрэтии күүскэ барар этэ. Манна биири тоһоҕолоон этэр хайысхам — оскуолаҕа начаалынай байыаннай бэлэмнээһин (НВП) диэн бырагыраама баара. Үөрэх бырагырааматыгар оҕону иитиигэ араас уларыйыылар киирбиттэрин түмүгэр ол суох буолуута уол оҕону иитиигэ мэһэйдээҕин көрдөрдө. Мин санаабар, оскуолаҕа үөрэх бырагырааматыгар начаалынай байыаннай бэлэмнээһини биир сүрүн биридимиэт быһыытынан киллэрэн биэрэр кэм кэллэ. Билигин РФ Бэрэсидьиэнэ В.В.Путин, Ил Дархан А.С.Николаев бу суолталаах боппуруоһу үөрэх бырагырааматыгар киллэрээри чопчулаан үлэлэһэ сылдьаллар.
Онон, бастатан туран, оҕолорбутун патриотическай өттүнэн иитэр буоллахпытына, олорор төрүт түөлбэлэриттэн саҕалаан, бииргэ төрөөбүттэрин, аймахтарын, төрүччүлэрин, тулалыыр үтүөкэн үлэһит дьоннорун, үлэ, сэрии дьоруойдарын, норуот абыычайын, култууратын, духуобунай баайын билэ улаатар, атын омуктарга ытыктабыллаах сыһыаннаах буолар эйгэлэри кинилэргэ тэрийэн биэриэхтээхпит. Итини ситиһэргэ бу аныгы кэмҥэ балачча үчүгэй усулуобуйалар бааллар.
Патриотическай өй-санаа диэн бу байыаннай эрэ өттүнэн уһуйуу, үөрэтии буолбатах. Бу барыта — тулалыыр эйгэбитин таптааһын, харыстааһын, араҥаччылааһын, ытык саастаах дьоммутун убаастааһын, үлэһит дьоммутун, дьоруойдарбытын өрө тутуу, чиэстээһин, холобур оҥостуу, кинилэргэ тэҥнэһэр үлэни-хамнаһы ыытыы буолар диэн тус санаалаахпын. Хас биирдиибит ис сүрэҕиттэн тапталлаах Ийэ сирин араҥаччылыырга бэлэм, атын норуоттары кытта тэҥҥэ биир өйүнэн-санаанан дойду кыаҕырарын, сайдарын туһугар өйдөһөн, түмсэн сылдьар буоллаҕына, Арассыыйа модун судаарыстыбатын туох да кыайыа суоҕа.
Бүтэһикпэр этиэм этэ, бу уустук быһыыттан-майгыттан кыайыылаах тахсарбытыгар барыбыт сомоҕолоһуута, дойду туһугар, биир киһи курдук, турунуута быһаарар оруоллаах.