Саргын Скрябин хаартыскаҕа түһэриитэ (ЯСИА)
Дьокуускайга Өймөкөөн улууһа тэриллибитэ 105 сылыгар анаммыт «Саахал кэннэ чөлүгэр түһэрэр үлэлэр — 2025 түмүктэрэ» диэн төгүрүк остуол буолла. Дьүүллэһиигэ СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников, Өймөкөөн улууһун баһылыга Александр Оконешников, ону тэҥэ сайыҥҥы халаан содулун туоратыыга кыттыбыт өрөспүүбүлүкэтээҕи биэдэмистибэлэр уонна сулууспалар бэрэстэбиитэллэрэ кытыннылар.
Кыттааччылар быйыл улуус сиригэр-уотугар ыытыллыбыт саахалы чөлүгэр түһэрэр үлэлэр түмүктэрин дьүүллэстилэр. Бары биэдэмистибэлэр уонна улуус дьаһалтата түмсүүлээхтик үлэлээбиттэрин түмүгэр халаан содулун кыччатар, нэһилиэнньэҕэ түргэнник көмөнү оҥорор кыаллыбытын бэлиэтээтилэр. СӨ Бырабыыталыстыбатын аатыттан Дмитрий Садовников Өймөкөөн улууһун олохтоохторун уонна салалтатын улуус тэриллибитэ 105 сылынан эҕэрдэлээтэ. Кини Өймөкөөн сирин — тымныы полюһун уратытын, Арктика тыйыс усулуобуйатыгар олорор дьон тулуурдарын, санааларын күүһүн уонна хорсун быһыыларын бэлиэтинэн буоларын эттэ.
«Өймөкөөн улууһун устуоруйата — үгүс көлүөнэ дьон хорсун быһыытын летопиһа. Кинилэр бэйэлэрин харыстаммакка үлэлээбиттэрэ уонна төрөөбүт дойдуларыгар бэриниилэрэ дириҥ ытыктабылы эрэйэр», — диэн кини бэлиэтээтэ. Улуус дьаһалтата сайыҥҥы халаан кэмигэр эппиэтинэстээхтик уонна түмсүүлээхтик үлэлээбитигэр анаан махтал тыллара этилиннилэр. Түргэн быһаарыныылар, өрөспүүбүлүкэтээҕи сулууспалары кытта чопчу дьүөрэлэһии уонна салалта бэйэтинэн кыттыыта эмсэҕэлээбит олохтоохторго көмөнү ситиһиилээхтик тэрийэргэ кыах биэрбитэ. Ону таһынан, Дмитрий Садовников көмөҕө түргэнник кэлбит уонна саахалы чөлүгэр түһэрэр үлэлэргэ улахан кылааттарын киллэрбит атын улуустар салайааччыларыгар махталын биллэрдэ.
«Бүгүн улуус инникигэ эрэллээхтик көрөр, экэнэмиичэскэй кыаҕын, социальнай эйгэтин сайыннарар уонна төрүт олохтоох омуктар баай култуурунай үгэстэрин харыстыыр», — диэн Бырабыыталыстыба Бэрэссэдээтэлин бастакы солбуйааччыта эттэ.
Санаттахха, ардахтан үөскээбит халаан түмүгэр Өймөкөөн улууһугар 113 олорор дьиэ эмсэҕэлээбитэ. Нэһилиэнньэни өйөөн, 1152 киһиэхэ биир кэмнээх материальнай көмө, оттон малларын-салларын сүтэрбит 332 олохтооххо (онтон 203 — малларын-салларын толору сүтэрбиттэргэ, 129 — сорҕотун сүтэрбиттэргэ) үп-харчы көмөтө оҥоһуллубута.
94 ыал өрөмүөн үлэтин ыытарга 200-түү тыһыынча солкуобайдаах биир кэмнээх үп-харчы көмөтүн ылбыта. Дьиэлэригэр бас билии докумуона суох 11 ыалга бүддьүөттэн харчы булан, эмиэ итинник көмө оҥоһуллубута. Биэрэк Үрдэ сэлиэнньэтигэр олорор дьиэлэрин сүтэрбит икки ыалга икки саҥа дьиэни тутарга 27 мөлүйүөн солкуобай үп-харчы көмөтө бэриллибитэ. Элбэх кыбартыыралаах дьиэлэргэ олорор сирдэрин сүтэрбит үс ыалга «Мин Сахам сирэ XXI үйэҕэ» үтүө дьыалалар өрөспүүбүлүкэтээҕи хамсааһыннарын бырайыагын чэрчитинэн тутулла турар түөрт кыбартыыралаах дьиэҕэ саҥа кыбартыыралар бэриллибиттэрэ. Эмсэҕэлээбит нэһилиэнньэлээх пууннарга тутуу матырыйааллара тиэрдиллибиттэрэ, массыына суолларыгар өрөмүөн үлэтэ толору түмүктэммитэ. Сиһилии: https://www.sakha.gov.ru/news/16370*
Дьокуускай куорат полициятын 3-с нүөмэрдээх салаатын учаастактааҕы боломуочунайдара Уус Алдан улууһуттан төрүттээх, урут сууттана сылдьыбыт…
Сахалар төрүт итэҕэлбитинэн, таҥха кэмигэр чуумпутук, сэмэйдик сылдьыахтаахпыт. Ол эрээри, тугу гыныахтаахпытын сиһилии билбэппит. Таҥха…
Бу тэрээһиҥҥэ араас тэрилтэлэр салайааччылара, исписэлиистэрэ уонна анал байыаннай дьайыы кыттыылаахтарын дьиэ кэргэттэрин кыһалҕаларын кытта…
Оскуола саастаах оҕо улахан киһи курдук күҥҥэ үстэ аһыырынан муҥурдаммат. Кини оскуолаҕа сылдьан остолобуойга, чугастыы…
Үөрэҕи уонна билими кэтээн көрөр федеральнай сулууспа иһитиннэрэринэн, оскуоланы бүтэрээччилэр олунньу 1 күнүгэр диэри биир…
Дьокуускайдааҕы полиция 4-с нүөмэрдээх отделын дьуһуурунай чааһыгар биир олохтоох дьахтартан төлөпүөнүн уордарбытын туһунан сайабылыанньа киирбит.…