Дмитрий Садовников Өлүөхүмэ улууһугар үлэлиир

Өлүөхүмэ улууһугар эргэ уонна саахалланар туруктаах дьиэттэн дьону көһөрүү бырагыраамата ситиһиилээхтик үлэлиир. 2019 сылтан саҥа кыбартыыра күлүүһүн 1 592 киһи – 778 ыал тутан аныгы, толору хааччыллыылаах кыбартыыраҕа көстө. Бырабыыталыстыба бэрэссэдээтэлин бастакы солбуйааччы Дмитрий Садовников үлэтин иитинэн саҥа дьиэлэри уонна улуус сүрүн хомунаалынай эбийиэктэрин көрдө.  

Дмитрий Садовников Өлүөхүмэҕэ Строд уулуссатыгар элбэх кыбартыыралаах дьиэлэр тутууларын  бэрэбиэркэлээтэ. Манна сотору олохтоохтор көһөн киириэхтээхтэр. 31-с нүөмэрдээх бастакы дьиэ номнуо үлэҕэ киирбитэ, кэтээн көрөр уорганнар туох баар ирдэнэр көҥүллэрэ, түмүктэрэ бэриллибитэ. Куорат дьаһалтата дьон бас билиитигэр 48 кыбартыыраны биэрээри докумуонун оҥорор. 50-с нүөмэрдээх иккис дьиэ 95% бэлэм, сантехникатын туруоруу уонна тупсарыы үлэтэ бүтэн эрэр.

“Биллэн турар, өссө да элбэх үлэ ыытыллара ирдэнэр – саҥа бырагырааманан 2026 сылга диэри 1621,67 к.м. 39 олорор дьиэттэн дьону көһөрүү былааннанар. Биһиэхэ дьиэни тутуу эрэ буолбакка, хаачыстыбалаах куорат эйгэтин тэрийии, дьон табыгастаахтык олорорун хааччыйыы суолталаах” – диэн Дмитрий Садовников бэлиэтиир.

Бу сырыыга сүрүн болҕомтону куорат олохтоохторун ыраас иһэр уунан хааччыйыыга уурдулар. Дмитрий Садовников “СӨ ОДьКХ” ГУП  “Водозабор” бастакы ыстаансыйатыгар сырытта. “Олох-дьаһах уонна куорат эйгэтэ” национальнай бырайыак “Ыраас уу” федеральнай бырайыак иитинэн тутуу 100% бүппүтэ.  Саҥа уу ылар ситим сууккаҕа 2400 кубометр ууну тиэрдэргэ суоттанар, номнуо бу сыл ахсынньытыгар штатнай эрэсиим быһыытынан үлэтин саҕалыахтаах.

Уу ыстаансыйатын тутуу – хомунаалынай инфраструктураны уларытыы киэҥ далааһыннаах ситимнээх үлэтин сорҕото. 2019 сылтан Саха сиригэр уу ситимин 13 эбийиэгэ тутуллубут, уларытан оҥоһуллубут, онтон 2025 сылтан хомунаалынай комплексы сайыннарыы “Инфраструктура для жизни” национальнай бырайыак “Хомунаалынай инфраструктураны саҥардыы” саҥа федеральнай бырайыак чэрчитинэн барар.

Итини  сэргэ, Дмитрий Садовников былырыын ыам ыйыгар тэрил дэлби тэбиитэ (хлопок) тахсыбыт “ОВТК” хочуолунайыгар сырытта. Билигин хочуолунай 2025-2026 сс. оттук кэмигэр олоччу бэлэм.

Күн бүгүн Өлүөхүмэ хочуолунайдарын гаас уматыкка көһөрүү кэскилин туһунан кэпсэтэллэр.

Маны тэҥэ, Солянка-Харыйалаах-Балаҕаннаах учаастагынан “Умнас” массыына суолун тутуу үлэтэ салгыы барар. Бастакы 10 км номнуо оҥоһуллубута, үлэҕэ туттарыллыбыта. Билигин кэлэр түһүмэх үлэтэ саҕаланар – өссө 30 км суолу тутуу, ону 2027 сыл бүтүүтэ бүтэрэр былааннаахтар.

Бу туһунан Саха Өрөспүүбүлүкэтин официальнай иһитиннэрэр порталыгар суруйаллар. Сиһилии манна ааҕыҥ.