Дмитрий Садовников хаарбах дьиэттэн дьону көһөрүү кыраапыгын дьүүллэстэ

Бүгүн, балаҕан ыйын 5 күнүгэр, СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников салалтатынан «2019-2025 сылларга гражданнары саахалланар туруктаах дьиэ пуондатыттан көһөрүү» өрөспүүбүлүкэтээҕи анал сыаллаах бырагырааманы олоххо киллэриигэ туһаайыллыбыт мунньахха эбийиэктэри тутуу уонна дьону саҥа дьиэҕэ көһөрүү кыраапыгын дьүүллэстилэр.

2019 сылтан саҕаламмыт бырагыраама 2025 сылга түмүктэнэр. Бу кэм устата 2022-2024 сыллар чэрчилэринэн элбэх кыбартыыралаах 215 дьиэни үлэҕэ киллэрии былааннанар. Бүгүҥҥү күҥҥэ 47 эбийиэк тутуута түмүктэнэ илик.

«Бу үлэни сүрүннүүр ыстаап олохтоох салайыныы уорганнарын кытта балаһыанньаны өрүү кэтээн көрөр. Сотору кэминэн үлэҕэ киирбэтэх дьиэ ахсаана биллэ аҕыйыаҕа диэн сабаҕалыыбыт. Элбэх эбийиэк бүтэһик түһүмэххэ киирдэ», — диэн бэлиэтээтэ Дмитрий Садовников.

Мунньахха сыл бүтүөр диэри үлэҕэ киириэхтээх 2024 сыллааҕы түһүмэх 13 эбийиэгэр ураты болҕомто уурулунна. Хас да тутуу үрдүк бэлэмнээх, ол гынан баран 30% эрэ кэриҥэ бэлэмнээх эбийиэктэр эмиэ бааллар. Мунньах кыттыылаахтара үлэни түргэтэтэр миэрэлэри  дьүүллэстилэр. Үгүс дьиэ алтынньы уонна сэтинньи ыйдарга үлэҕэ киирэрэ былааннанар.

Дьону саахалланар туруктаах дьиэттэн көһөрүү бырагыраамата Арассыыйаҕа Бэрэсидьиэнэ Владимир Путин көҕүлээһининэн 2008 сылтан олоххо киирбитэ.  2019 сылтан бу бырагыраама «Дьиэ-уот уонна куорат эйгэтэ», 2025 сылтан — «Олох инфраструктурата» национальнай бырайыак чэрчитинэн ыытыллар.

Сиһилии билсэр сигэ: https://www.sakha.gov.ru/news/11284