Дмитрий Садовников Мэҥэ Хаҥаласка нацбырайыактарынан тутуллар эбийиэктэри көрдө

Бүгүн СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников Мэҥэ Хаҥалас улууһун Майа сэлиэнньэтин ытык сиригэр – «Кыайыы Аартыга» монумены чөлүгэр түһэрии үлэтин хаамыытын билистэ.

Кыайыыбыт монуменыгар, «Таптал көлүччэтэ» икки түһүмэхтээх улахан үлэ ыытыллар диэн Мэҥэ Хаҥалас улууһун дьаһалтатын пресс-сулууспата иһитиннэрэр. Быйыл сүрүн үлэтэ бүтүөхтээх.

Дмитрий Садовников ону таһынан «Доруобуйа харыстабыла» национальнай бырайыагынан 33 киһи сытар миэстэлээх балыыһа комплексын тутуутун, «Амма» өрөспүүбүлүкэтээҕи айан суолун 6 км 600 миэтэрэ уһуннаах кэрчигин аспааллааһыны көрдө. «Хаачыстыбалаах уонна куттала суох суоллар» национальнай бырайыагынан Аллараа Бэстээх – Майа хайысхатынан оҥоһулла сылдьар суолу бэрэбиэркэлээтэ.

«Мүрү» өрөспүүбүлүкэтээҕи суолга Майаттан Ураһалаах алааска диэри 3 км, Догдоҥо нэһилиэгэр 700 миэтэрэ уһуннаах суол оҥоһуута саҕаланыа. Бүгүҥҥү күҥҥэ бэлэмнэнии үлэтэ ыытыллар, былаан быһыытынан эһиилги дьылга бу үлэлэр бүтүөхтэрэ.