Дмитрий Садовников министиэристибэ кэлэктиибигэр саҥа солбуйааччыны билиһиннэрдэ

Саха сирин бастакы вице-премьера Дмитрий Садовников Баайга-дуолга уонна сир сыһыаннаһыыларыгар миниистир бастакы солбуйааччытынан анаммыт Светлана Арбузованы  министиэристибэ кэлэктиибигэр билиһиннэрдэ.

Светлана Арбузованы анааһын туһунан Ил Дархан Айсен Николаев Ыйааҕа бүгүн, ыам ыйын 16 күнүгэр, тахсыбыта. Биэдэмистибэ баһылыгын бастакы солбуйааччытын дуоһунаһыгар баай- дуол уонна сир бэлиитикэтин боппуруостарын көрүөҕэ.

«Уопуттаах, грамотнай юрист. Киһи быһыытынан үлэҕэ түргэнник киириэҕэ уонна ол кэмтэн ыла Саха сирин сир бэлиитикэтин, баай- дуол сыһыаннаһыыларын сайыннарыыга улахан кылааты киллэриэҕэ диэн эрэнэбин. Ситиһиилээх үлэни  баҕарабын», — диэтэ Дмитрий Садовников.

Светлана Арбузова үлэтин биографията ИДьМ-тин кытта сибээстээх. Кини карьератын силиэдэбэтэлинэн саҕалаабыта. Суһал, экэнэмиичэскэй куттал суох буолуутун кытта сибээстээх араас салайааччы дуоһунаһыгар үлэлээбитэ. Кэнники сылларга СӨ ИДьМ тыыл салаатын тэрийии отделын начаалынньыгынан салайбыта.

Светлана Александровна үрдүк үөрэхтээх, Москватааҕы юридическай институту бүтэрбитэ. ИДьМ биэдэмистибэннэй наҕараадаларынан, СӨ Бэрэсидьиэнин Бочуотунай грамоталарынан бэлиэтэммитэ, СӨ үтүөлээх юриһа.

СӨ Ил Дарханын уонна бырабыыталыстыбатын пресс-сулууспата