Дмитрий Садовников: ойуур баһаардарын уонна халаан уутун сезонугар бэлэмнэнии ыытыллар

Муус устар 10 күнүгэр Чурапчы сэлиэнньэтигэр Бырабыыталыстыба бэрэссэдээтэлин бастакы солбуйааччы Дмитрий Садовников салайааччылаах тоҕус улуус бэрэстэбиитэллэрэ кыттыылаах сүбэ мунньах ыытылынна.

«Саха сирин Ил Дархана нэһилиэнньэлээх пууннары халаан уутуттан уонна ойуур баһаардарыттан бэлэмнээх буолууга сорудаҕы туруорда», — диэтэ Дмитрий Садовников.
Сүбэ мунньахха гидротиэхиньиичэскэй тутуулар уонна мелиорация эбийиэктэрэ, нэһилиэнньэҕэ иһитиннэрэр ситим бэлэмнэрин дьүүллэстилэр.
Саха сиринээҕи гидрометеорология управлениетын начаалынньыгын солбуйааччы Вячеслав Шехиров этэринэн, муус устар 10 күнүнээҕи туругунан муус халыҥа орто көрдөрүүттэн намыһах – 60 см диэри.
«Нуорматтан арыый халыҥ муус Өлүөнэ өрүскэ Пеледуй-Крестовка учаастагар, Өлүөхүмэ куорат уонна Сангаар бөһүөлэк таһыгар, Алдан өрүскэ — Батамай таһыгар, Халыма өрүскэ — Зырянка аннынан бэлиэтэнэр. Өрүстэр кэмигэр устуохтара: Өлүөнэ өрүс Дьокуускайга диэри, ону тэҥэ Алдан, Амма, Бүлүү өрүстэр ыам ыйын бастакы уонна иккис дэкээдэлэригэр, Алдан, Өлүөнэ, Бүлүү өрүстэр алын өттүлэрэ, Бүлүү, хоту  уонна хотугулуу-илин өрүстэрэ — ыам ыйын үһүс дэкээдэтигэр», — диэтэ кини.
Дмитрий Садовников Саха сирин ыксаллаах быһыы-майгы ситимин муниципальнай звеноларын хамаандалыыр ыстаабын үөрэхтэригэр этиллибит итэҕэстэри туоратарга ыҥырда. Кини Амма, Таатта, Томпо, Уус Алдан уонна Уус Маайа сулууспаларын үлэлэрин кытта сыһыаннаах боппуруостарыгар болҕомтотун уурда. Сүөһүнү уонна сылгыны үрдүк сиргэ таһаарыыга үөрэҕи 15 улууска тэрийэн ыытыахтара.
Ас-үөл саппааһыгар, быстах олордор пууннарга, минерализованнай балаһалары оҥорууга, баҕа өттүнэн тэриллибит баһаарынай дружиналарга сыһыаннаах сорудахтар бэрилиннилэр.

СӨ Ил Дарханын уонна Бырабыыталыстыбатын пресс-сулууспата