Дмитрий Садовников Саха сиригэр социальнай эбийиэктэр тутууларын хаамыытын дьүүллэстэ

Саха сирин бырабыыталыстыбатын бэрэссэдээтэлин бастакы солбуйааччы Дмитрий Садовников өрөспүүбүлүкэҕэ социальнай эбийиэктэри тутуу боппуруостарыгар мунньах ыытта.

Тэрээһин кэмигэр доруобуйа харыстабылын уонна үөрэх эйгэтигэр тутулла турар сэттэ эбийиэк дьүүллэһилиннэ. «Бу эбийиэктэртэн хас биирдиитэ – оскуола, балыыһа эбэтэр оҕо уһуйаана буоллун оҕолорбут кэскиллэрин уонна Саха сирин бары олохтоохторун доруобуйатын туһугар улахан кылаат буолар. Тутуулар бары күннээҕи хонтуруолга тураллар, биһиги кинилэри болдьоҕор үлэҕэ киллэрэр туһугар бары кыһалҕаны ууруохпут», – диэн Дмитрий Садовников бэлиэтээтэ, диэн www.sakha.gov.ru иһитиннэрэр.

Түмүктэнэн эрэр эбийиэктэртэн биирдэстэринэн Дьокуускай куорат «Спортивнай» түөлбэтигэр 240 миэстэлээх оҕо уһуйаана буолла. Дьиэ бэлэмэ 99% тэҥнэһэр, билиҥҥи кэмҥэ аныгылыы миэбэли уонна тэрили туруоруу бара турар. Эбийиэги быйыл сэтинньигэ үлэҕэ киллэрэр былааннаахтар. Бүлүүгэ эмтиир корпус тутуутугар биллэр хамсааһын ситиһилиннэ, бэлэмэ 86% диэн сыаналанар. Үс мэндиэмэннээх дьиэҕэ иһин-таһын ситэрии үлэлэрэ уонна технологическай тэриллэри туруоруу күүскэ бара турар. Мэдиссиинэ тэрилтэтин 2026 сыл олунньу бүтүүтэ арыйар былааннаахтар. Ол эрээри, сорох эбийиэктэр ураты болҕомтону ирдииллэр. Ньурбаҕа эмтиир куорпус тутуута кыраапыктан улаханнык хаалан иһэрэ бэлиэтэнэр – бэлэмэ 37% эрэ. Бэдэрээтчиккэ сыһыаннаан үбүнэн ыстарааптары олохтууллар уонна хаалыыны ситэр сыалтан икки симиэнэлээх үлэ эрэсиимэр көһүү боппуруоһун дьүүллэһэллэр. Майа сэлиэнньэтигэр балыыһа комплекса эмиэ күүстээх хонтуруолга турар. Тутуу үлэтэ көхтөөхтүк баран иһэр да буоллар, үлэһит ахсаана тиийбэтиттэн кыраапыктан хаалыы баар. Бэдэрээтчиги кытта бигэргэтиллибит болдьоҕу тутуһар инниттэн үлэһиттэри эбии таһаарыы боппуруоһа быһаарыллар. Үөрэх эйгэтигэр балаһыанньа араас. Сунтаарга лиссиэй тутуута үчүгэй тэтиминэн барар – бэлэмэ 80% ситтэ. Намҥа оскуола 70% бэлэм, ол эрээри манна үлэ тэтимин күүһүрдүү ирдэнэр. Икки үөрэх тэрилтэтин кэлэр сылга үлэҕэ киллэрэр былааннаахтар. Мииринэйгэ Оҕо аймах дыбарыаһын тутуута улахан долгуйууну үөскэтэр. Эбийиэк 80% бэлэм буолан баран, бэдэрээтчик буруйунан хас да сыл устата бүтэр кыаҕа суох турар. Толорооччу-хампаанньаҕа сыһыаннаан сокуонунан көрүллүбүт бары ыстарааптыыр сааҥсыйалар туттуллаллар, ону тэҥэ тутууну болдьоҕор түмүктүүр сыалтан миэрэлэр ылыллаллар.