Дмитрий Сергин: «Байыастар дьиэ кэргэттэригэр — 1760 киһиэхэ көмө оҥоһулунна»

Доруобуйа харыстабылын систиэмэтигэр байыаннай дьайыы кыттыылаахтарыгар уона кинилэр дьиэ кэргэттэригэр мэдиссиинэ көмөтө, чөлгө түһэрии бастакы уочарат оҥоһуллар. Бу туһунан доруобуйа харыстабылын миниистирин солбуйааччы Дмитрий Сергин брифинг кэмигэр кэпсээтэ.

— Мэдиссиинэ көмөтө байыаннай дьайыы кыттыылааҕын дьиэ кэргэттэригэр — 1760 киһиэхэ оҥоһулунна, мантан 1400 киһиэхэ — амбулаторияҕа, 64 киһиэхэ — балыыһаҕа, 80 киһи мэдиссиинэ көмөтүнэн доруобуйатын чөлгө түһэрии өҥөтүнэн туһанна. Министиэристибэ уонна мэдиссиинэ тэрилтэлэрэ маннык көмөнү оҥороллоро салҕанар, — диэн кини эттэ.

Байыастар дьиэ кэргэттэриттэн 160 киһи сонотуоруйга-куруорка эмтэммиттэр.

Байыаннай дьайыыттан кэлбит байыас сыһыарыллыбыт поликлиникатыгар барар, эбэтэр, 122 нүөмэргэ эрийиэн сөп, оччотугар киниэхэ доруобуйатын чөлгө түһэрэргэ тус бырагыраама оҥоһуллар.