Сайаана Львова хаартыскаҕа түһэриитэ
Ил Дархан Айсен Николаев ааспыт сылга Ил Түмэҥҥэ туһаайан этиитигэр Саха сиригэр доруобуйа харыстабылын кэлим сайдыытыгар кэскиллээх соруктары туруорбута. Ол туһунан СӨ Доруобуйа харыстабылын миниистирин солбуйааччы Дмитрий Сергин санаатын үллэстэр:
-Ил Дархан ааспыт сыллааҕы туһаайан этиитигэр Аҕа дойду көмүскээччилэрин сылынан биллэрбитэ уонна Улуу Кыайыы 80 сылын киэҥник бэлиэтиир туһунан эппитэ. Онон үгүс тэрээһин онно анаммыта. Байыаннай дьайыы кыттыылаахтарын мэдиссиинэ көмөтүнэн хааччыйыыны күүһүрдэр туһунан соругу эмиэ туруорбута. Биһиги ити хайысхаҕа эмиэ күүстээх үлэни ыыттыбыт. Байыаннай дьайыы кыттыылаахтарыгар «Күөх көрүдүөр» хайысханы тэрийэммит мэдиссиинэ көмөтүн харгыһа суох, тута ылалларын тэрийдибит. Айсен Сергеевич доруобуйа харыстабылыгар каадыры бэлэмнээһиҥҥэ эмиэ болҕомтотун уурбута. Быйыл Саха сиригэр каадыры бэлэмнээһиҥҥэ улахан болҕомто уурулунна. Доруобуйа харыстабылын салаатыгар каадыр тиийбэт кыһалҕатын быһаарарга, бүддьүөт суотугар уонна тус сыаллаах үөрэнэр устудьуоннары үлэҕэ анааһын үөрүйэҕэ биһиэхэ баар буолбута хас да сыл буолла уонна үчүгэй түмүктэри биэрдэ. Ону таһынан Доруобуйа харыстабылын министиэристибэтэ оскуолалары мэдиссиинэ каадырдарыгар сыһыарар кыттыгас үлэлэрэ үтүө түмүктээх. 12 улууска мэдиссиинэ кылаастара аһыллыбыттара, кинилэр М.К.Аммосов аатынан Хотугулуу-Илиҥҥи федеральнай университеты, Дьокуускайдааҕы уонна Нерюнгритааҕы мэдиссиинэ кэллиэстэрин кытта ыкса үлэлэһэллэр. Ил Дархан доруобуйа харыстабылыгар каадыры бэлэмнээһин бу модела өйүөнүөхтээх, ол иһигэр миэстэтигэр мэдиссиинэ тэрилтэтэ кыттыылаах, ону тэҥэ, Хотугулуу-Илиҥҥи федеральнай университеты кытта бииргэ профильнай кылаастар үөрэнээччилэрин мэдиссиинэ исписээлинэстэригэр бэлэмнииргэ тиһиктээх үөрэх бырагырааматын оҥороллоругар этии киллэрэбитэ.
Ону таһынан 2028 сылга диэри тутуллуохтаах 15 саҥа бөдөҥ эбийиэктэн аҕыһа номнуо 2025 сылга үлэҕэ киирдэ: Амма сэлиэнньэтигэр поликлиника, Бүлүү уонна Ньурба куораттарыгар, Нам улууһун Намыгар уонна Үөһээ Бүлүү Андреевскайыгар балыыһалар, Майаҕа балыыһа комплекса, Кэбээйи улууһугар Сангаарга поликлиникалаах комплекс, Аллараа Бэстээххэ учаастактааҕы балыыһа. Онон доруобуйа харыстабылыгар кэлим үлэ барар. Бу анал этииттэн өссө элбэх саҥаны күүтэбит.
Сахабыт сирин араас улуустарыттан төрүттээх үлэһит дьон, кинилэр байыаннай дьайыыга ураты хорсун уонна дьоруойдуу быһыыны…
СӨ Ил Дархана Айсен Николаев СӨ Судаарыстыбаннай Мунньаҕар (Ил Түмэҥҥэ) туһаайан этиитигэр 2026 сылга балтараа…
Сааҥсыйалар күүһүрбүт кэмнэригэр даҕаны өрөспүүбүлүкэ экэниэмикэтэ туруктаах диэн Ил Дархан Айсен Николаев Ил Түмэҥҥэ туһаайыытыгар…
Ил Дархан Айсен Николаев бүгүн Ил Түмэҥҥэ этиитигэр аҕа көлүөнэ бойобуой үгэстэрин байыаннай дьайыыга сылдьар…
Саха сиригэр 2026 сыл тохсунньу 1 күнүттэн күүһүгэр киириэхтээх олохтоох бэйэни салайыныы туһунан сокуон ылылынна.…
Ил Дархан бүгүн, ахсынньы 23 күнүгэр, Ил Түмэҥҥэ туһаайан этиитин оҥордо. Кини 2026 сылы Култуура…