Дмитрий Соловьев: «Саҥа куурус тутуһулунна»

“Бэрэсидьиэн Этиитэ Арассыыйа мантан салгыы арҕаа дойдулар диэки хайыһан көрбөккө, тус суверенитетин бөҕөргөтүнэн, устуоруйатын, духуобунаһын өрө тутан, айылҕа баайдаах, айар-тутар дьонноох, үрдүк технологиялары сайыннарар кыахтаах, туспа суоллаах-иистээх дойдуну барҕардар саҥа кууруһу тутуспутун туоһулаата», — диир Дьокуускайга «Арассыыйа — мин устуоруйам» түмэл комплексын дириэктэрэ Дмитрий Соловьев.

— Бэрэсидьиэн Этиитигэр киһи улаханнык сэргиир сонун этиилэрин оҥордо. Онтон көстөрүнэн дойдубутугар билигин баар арҕааҥҥы сыаннастары, арҕааҥҥы ырыынагы өрө тутууну ууратан, дьиҥ бэйэбит төрүт сыаннастарбытыгар тирэҕирэн сайдыахтаахпытыгар болҕомто туһаайылынна. Киһи ис кыаҕын сайыннарар, дойдуга баар технологияларын саҥардынар, үлэ усулуобуйатын тупсарынар сыалы ситиһэр соруктаах Российскай Федерация кимтэн да тутулуга суох быһаарыныылаах, туспа сыаллаах-соруктаах, бэйэтин бас билинэр держава быһыытынан үүнэн иһиитэ куомуннаспыт арҕааҥҥы дойдулар былааннарыгар сөп түбэспэт. Маны кинилэр төрүт сөбүлээбэттэр. Ол сөбүлээбэттэрэ соруйан күөртүүр иирсээннэригэр, урукку Сойууска бииргэ олорбут бырааттыы дойдуларбытыгар, Европа илиҥҥи дойдуларыгар биһиэхэ өстөөх режими олохтооһуннарыгар көстөр.

Күн бүгүн арҕааҥҥы дойдулар Арассыыйаны утары куомуннаһыылара Аҕа дойду Улуу сэриитин кэмигэр ССРС утары туруммут арҕаа дойдулар саҕанааҕы курдук хартыынаны көрдөрөр. Бу дойдулар, чуолаан, АХШ өр сыллар усталарыгар ыыппыт бэлиитикэлэринэн Украинаҕа националистыы санаа иитиэхтэнэн сайдан таҕыста. Ол түмүгэр Арассыыйа кыраныыссатын устатын тухары биһиги дойдубутун, тылбытын-өспүтүн, култуурабытын, духуобунаспытын, итэҕэлбитин уо.д.а. абааһы көрүүгэ ускайдааһын, күөртээһин күүскэ ыытыллар. Ити Арассыыйа бэйэтин чөл буолуутун, суверенитетин харыстыырын туһугар биир чопчу быһаарыныыны ыларыгар күһэйдэ: устуоруйанан ыкса сибээстэммит олохпут төрүт үгэстэрин, норуоппутун, төрөөбүт тылбытын, итэҕэлбитин, инники сайдыыбытыгар куттал суол буолуутун, суверенитеппитин көмүскүөх тустаахпыт.

Владимир Путин норуот айар кыаҕар тирэниэхтээхпит диэн эттэ. Үөрэхтээһин, билим, тырааныспар, тутуу, араас инфраструктура хайысхаларыгар, ол иһигэр Хотугу муоранан уу суолугар, үрдүк технологиялаах мэдиссиинэ өҥөтүгэр инники сайдыыга өрө дабатар саҥа технологиялары айан таһаарыыга күүскэ үлэлиир соругу туруорда. Төһө да уустук кэм турдар, билиҥҥи кэмҥэ Арассыыйа экэниэмикэтин, бааннарын, үлэ ырыынагын таһымнара туруктаах буолууну көрдөрөллөр. Ол аата, сааҥсыйаттан тутулуга суох бэйэбит олохпутун сатаан оҥостор кыах баар.

Онон бу билиҥҥи олорор киэппитин арыый уларытан, киһи айан-тутан оҥорон таһаарар кыаҕын дойду экэниэмикэтин барҕардыыга, хаҥатыыга, сайыннарыыга туһаайыахтаахпыт. Арҕаа дойдулар суолларын батыһыы, өр сылларга бэйэни албыннаныы түөрэккэйэ көстөн таҕыста. Атын байылыат, үчүгэй дии саныыр дойдугар көһөн тахсан олоруу, дьиҥэр, бэйэ дойдутугар туох да куттала суох олоруу курдук буолбатах. Оннук санаанан көспүт бизнесменннэр, сорохторо, баҕар, чунуобунньуктар буолуо, бас билиилэриттэн, харчыларыттан маттылар, сойуолааһыҥҥа түбэстилэр. Владимир Путин бэйэ дойдутугар олорон, үлэлээн олохпутун тупсарыаҕыҥ, чэлгитиэҕиҥ диэн кинилэри эрэ буолбакка, барыбытын ыҥырда. Итинэн сибээстээн кини дьиэ кэргэттэри өйүүр дьаһалларга, социальнай мэктиэлэргэ тохтоото.

Түмүктээн эттэххэ, Бэрэсидьиэн Этиитэ Арассыыйа арҕаа дойдулар диэки хайыһан көрбөккө, тус суверенитетин бөҕөргөтүнэн, устуоруйатын, духуобунаһын өрө тутан, айылҕа баайдаах, айар-тутар дьоҕурдаах дьонноох, үрдүк технологиялары сайыннарар кыахтаах, туспа суоллаах-иистээх дойдуну барҕардар саҥа кууруһу тутуспутун туоһулаата.