Дмитрий Тихонов: «Мэҥэ Хаҥаласка бүтэһик уон сылга нэһилиэнньэ ахсаана биллэ элбээтэ»

Мэҥэ Хаҥалас улууһугар национальнай бырайыак чэрчитинэн тутуу күүстээхтик  ыытылла турар, маны таһынан бүтэһик уон сылга нэһилиэнньэ ахсаана элбээбит. Бу туһунан улуус баһылыга Дмитрий Тихонов санаатын үллэстэр:

— Биһиги улууспутугар бүгүҥҥү күҥҥэ 33 тыһыынча киһи олорор. Национальнай бырайыак чэрчитинэн хаарбах дьиэттэн көһүү бырагыраамманан сэттэ нэһилиэнньэлээх пууҥҥа тутуу ыытылла турар. Ону сэргэ Маттаҕа инбэлиттэргэ аналлаах дьиэ, Майаҕа 51 куойкалаах стационарнай балыыһа, Аллараа Бэстээххэ култуура киинэ тутулла турар. Кэлэр сылга үлэҕэ кириэхтээх.  Улууспут социальнай-экэнэмиичэскэй балаһыанньата муҥутаан сайдан турар кэмэ буолар. Бүтэһик уон сыл иһигэр нэһилиэнньэ ахсаана элбээбитин бэлиэтиэхпин баҕарабын. Улууспут сайдыыта сөптөөх хайысханан баран иһэр сүрүн бэлиэтэ бу буолар.