ДНӨ оҕолоро Ил Дархантан бэлэх туттулар

Донецкай Норуодунай Өрөспүүбүлүкэ оҕолоругар Айсен Николаевтан бэлэхтэри  туттардылар.

Саҥа дьыл иннинэ Саха сирин баһылыга “Баҕа санаа харыйата” Бүтүн Арассыыйатааҕы үтүө санаа аахсыйа чэрчитинэн аҕас-балыс Милана уонна Мирослава, ону тэҥэ сурдьуларын Тимофей баҕа санааларын толордо.

Кинилэр ийэлэрэ Айсен Николаевка оҕолор үөрүүлэрин-көтүүлэрин уһулбут видеотын ыыппыт, диэн иһитиннэрэр Ил Дархан, өрөспүүбүлүкэ пресс-сулууспата.

“Оҕолор дьиҥнээх үөрүүлэрин көрүү – дьиҥнээх дьол. Бүгүн Донецкай Норуодунай Өрөспүүбүлүкэттэн видео тутан баран итинник үөрүүгэ куустардым. Миигиттэн аҕас-балыс Милана уонна Мирослава Шпаковскаялар Саҥа дьыллааҕы бэлэхтэри туттулар. Кириэмилгэ баар «Баҕа санаахарыйатыгар» кинилэр Саҥа дьыллааҕы баҕа санаалара миэхэ түбэспитэ. Милана куукула дьиэтин баҕарара, онтон балта Мирослава сюрприз бэлэх көрдөспүт этэ. Бу сюрприһынан Алиса өйдөөх колонка буолбута. Кыргыттар Тимофей диэн 8 ыйдаах сурдьулаахтар, киниэхэ мин эмиэ бэлэх ыыппытым. Бу бэртээхэй ыал олоҕун киэргэппиппиттэн уонна кинилэргэ кыратык Саҥа дьыллааҕы дьиктини бэлэхтээбиппиттэн олус үөрдүм», — диэн Айсен Николаев аахсыйаҕа кыттыытын туһунан эттэ.

Дьиэ кэргэн аҕа баһылыга билигин байыаннай дьайыы зонатыгар Ийэ дойдутун көмүскүү сылдьар, оттон ийэлэрэ оҕолору кытта олорор.

“Оҕолор бэлэхтэн астыммыттар, куукула дьиэтигэр бииргэ оонньуу сылдьаллар, минньигэс аска туспа махтал. Биһиги дьиктигэ куруук итэҕэйиэхпит, тоҕо диэтэххэ, кинилэр туолаллар”, — диэн оҕолор ийэлэрэ кэпсээтэ.

Санатан эттэххэ, Айсен Николаев бүгүн Таатта улууһугар командировкаҕа сылдьан, Ытык-Күөл сэлиэнньэтигэр олорор 13 саастаах Рома баҕа санаатын толорон, бэлисипиэт бэлэхтээтэ. Кини суругун өрөспүүбүлүкэ баһылыга эмиэ “Баҕа санаа харыйата” Бүтүн Арассыыйатааҕы үтүө санаа аахсыйатыгар ылбыт.

Аҕыйах хонуктааҕыта Айсен Николаев “Баҕа санаа харыйата” аахсыйа чэрчитинэн Амма сэлиэнньэтигэр олорор  15 саастаах Артурга хомуһу туттарбыта.