Догдоҥо нэһилиэгэр култуура уонна успуорт комплекса аһылынна

Бэҕэһээ, Сомоҕолоһуу күнүгэр, Мэҥэ Хаҥалас улууһун Догдоҥо нэһилиэгэр «Мин Сахам сирэ 21-с үйэҕэ» өрөспүүбүлүкэтээҕи үтүө дьыала хамсааһынынан култуура уонна успуорт комплекса аһылынна.

Саҥа тутуу  үөрүүлээх аһыллыытын сиэригэр-туомугар  улуус баһылыга Дмитрий Тихонов, СӨ тутууга миниистирэ Виктор Романов, Ил Түмэн дьокутаата Андрей Находкин өрөспүүбүлүкэтээҕи «Мин Сахам сирэ 21 үйэҕэ» үтүө дьыала хамсааһын салайааччыта Алексей Петров, Догдоҥо нэһилиэгин баһылыга Петр Сивцев эҕэрдэ тылларын эттилэр, наҕараадаларын туттардылар.

—Эбийиэги олоххо киллэрбит «Стройкомплектсервис» бэдэрээтчит тэрилтэ  салайааччыта  Руслан Трофимов нэһилиэк баһылыгар ыраахтан-чугастан кэлбит ыҥырыылаах ыалдьыттар, нэһилиэк олохтоохторун, кэлэктиип ытыстарын тыаһыгар бэлиэ күлүүһү туттарда. Бу табыгастаах хамсааһын баар буолан тыа сиригэр култуура уонна успуорт күүскэ сайдыа, дьону-сэргэни ситимниэ, нэһилиэнньэни түмүө диэн бигэтик эрэнэбит. Санатан эттэххэ, былырыын бу үтүө дьыала бырагырааманан биһиги улууспутугар Алтан нэһилиэгэр саҥа култуура дьиэтэ олоххо киирэн күн бүгүн үлэлии турар, — диэн Мэҥэ Хаҥалас улууһун дьаһалтатын пресс-сулууспата иһитиннэрдэ.