“Доҕордоһуу саламата” — Солоҕон нэһилиэгэр

Атырдьах ыйын 9-11 күннэригэр Горнай улууһун Солоҕон нэһилиэгэр “Сайын” айар, литературнай түмсүүлэр II экспедиционнай сүлүөттэрэ буолан ааста. Манна Нам, Мэҥэ Хаҥалас, Кэбээйи, Ньурба, Горнай, Уус Алдан улуустарыттан, Дьокуускай к. кэлэн кытыннылар.

Бастакы күн кэлбит дьон олоҥхоһут Тэкээнэй уолун түмэл-дьиэтигэр, о.д.а. тэрээһиннэргэ сырыттылар. РФ Суруйааччыларын сойууһун чилиэнэ Александр Тарасов кыыһын Туяра Александровналыын көрүстүлэр. Маны тэҥэ “Биэс кинигэ” хомуурунньугу билиһиннэрии буолла, ааптардар: РФ суруйааччыларын сойууһун чилиэнэ Николай Васильев (Үөһээ Бүлүү), Эдэр литератордар сэбиэттэрин чилиэннэрэ Римма Крылова (Дьокуускай), Сюзанна Кондакова (Кэбээйи), Мария Андреева уонна Василий Тимофеев (Горнай). Тэрээһини “Дьүрүскэн” литературнай түмсүү салайааччыта Вера Новикова ыытта.

Иккис күн сүлүөт үөрүүлээх аһыллыытыгар Солоҕон нэһилиэгин баһылыга Александра Александрова уонна Горнай улууһун култуураҕа управлениетын начаалынньыга Вероника Быганова сүлүөтү тэрийээччилэргэ Семен Семеновка, Диана Сутаковаҕа, Мария Андрееваҕа уонна Василий Тимофеевка махтал суруктары туттардылар. Бу күн араас бырайыактарынан сэминээрдэр бэрт сэргэхтик аастылар. Хоһооҥҥо уонна ырыаҕа куонкурустар ыытылыннылар. Худуоһунньук, СӨ култууратын туйгуна Егор Аммосов уруһуй куонкуруһун уонна маастар-кылаас ыытта.
Өссө биир маастар-кылааһы Class Ac методиканан РФ суруйааччыларын сойууһун чилиэнэ Ираида Попова ыытта. Манна бастыҥ тиэкис иһин бирииһи Василий Тимофеев, актерскай маастарыстыбаларын иһин бириистэри Елена Тимофеева уонна Николай Захаров ыллылар.
Сүлүөт үһүс күнэ инсценировкалар куонкурустарыттан саҕаланна, салгыы видеографтар куонкурустара буолла.

Куонкурустар бүтэннэр, сүлүөтү түмүктүүр кэм үүннэ. «АйАрт» уопсастыбаннай тэрилтэ бэрэссэдээтэлэ Диана Сутакова тэрийээччилэргэ, спонсордарга, партнердарга махтал суруктары туттарда. Дьэ, куонкурустар кыайыылаахтарынан ким буолла?

“Сайын” тиэмэтигэр бэйэ айыы хоһоон күрэҕэр 1 миэстэни Сайаана Эверстова (Дьокуускай), 2 м. – Вера Новикова (Горнай улууһа), 3 м. – Сюзанна Кондакова (Кэбээйи улууһа), биһирэбил бирииһи Лилианна Егорова (Горнай улууһа) ыллылар. Оттон Савва Тарасов 90 сылыгар аналлаах хоһоон ааҕыытын күрэҕэр: 1 м. – Сайаана Эверстова, 2 м. – Игнатий Слепцов (Уус Алдан), 3 м – Наталья Пахомова (Мэҥэ Хаҥалас).

Раиса Захарова 70 сылыгар аналлаах ырыа күрэҕэр: 1 м. — Ньургуйаана Прокопьева (Мэҥэ Хаҥалас), 2 миэстэ — Игнатий Слепцов, 3 миэстэ — Маайа Григорьева (Нам).

Уруһуй күрэҕин кыайыылаахтарынан Горнайтан Наталья Ефремова буолла. Биһирэбил бириистэри Николай Захаровка (Горнай), Валентина Шадринаҕа (Горнай) уонна Ираида Поповаҕа (Дьокуускай к.) туттардылар.

Инсценировкалар күрэхтэригэр: 1 м. «Алгыстаах алаадьы» — Сайаана Эверстова, 2 м. «Күн сырдыгын баҕаран» — Ираида Попова, 3 м. «Кыыллар мунньахтара» — Игнатий Слепцов.
Видеографтар күрэхтэрэ: 1 м. — Ньургуйаана Прокопьева, 2 м. — Татьяна Иванова (Ньурба), 3 м. — Вера Новикова (Горнай).

II өрөспүүбүлүкэтээҕи экспедиционнай сүлүөт кыттыылаахтарыгар барыларыгар сэртипикээттэри туттардылар. Нам улууһуттан сылдьар Саргын кыыһа Күннэй Уран олохтоох суруйааччыга Анна Семеновна Протопоповаҕа тус бэйэтин аатыттан бириис биэрдэ.

«АйАрт» уопсастыбаннай тэрилтэ үтүө үгэһинэн Солоҕон нэһилиэгэр “Доҕордоһуу саламатын” ыйаатылар. Ситии быатын Кэбээйи улууһунааҕы «Лена долгуннара» литератунай түмсүү чилиэнэ Вера Прокопьева-Итэҕэл оҥорон ыыппыт.

“Сайын” сүлүөт өрөспүүбүлүкэҕэ айар үлэни сайыннарыыга олук уурар бырайыактары көҕүлүүр, олоххо киллэрэр, уопут атастаһар былаһаакканан буолла, диэн иһитиннэрэр «АйАрт» уопсастыбаннай тэрилтэ пресс-киинэ.