Доҕордоһуу муостата уурулунна, ыкса сибээс олохтонно

Амматтан тоҕус киһилээх дэлэгээссийэ бу күннэргэ Бүлүү куоракка үлэбитинэн бара сырыттыбыт.

Дэлэгээссийэ састаабыгар Амматааҕы эбии үөрэхтээһин тэрилтэлэрин салайааччылара, методистара уонна Амматааҕы үөрэх салалтатыттан Нь.И.Евсеева, Т.И.Шишигина бааллар. Бүлүүтээҕи «Кэскил» интеллектуальнай-айар кииҥҥэ үлэни хайдах тэрийбиттэрин, тирэх киин быһыытынан улууска ыытар үлэтин билистибит. Улуус киинигэр баар эбии үөрэхтээһин тэрилтэлэрин үлэтин көрдүбүт.

Оҕону сайыннарарга анаан ыытыллар үлэлэр хайысхаларын ырытыстыбыт, санаабытын үллэһиннибит.

Бүлүү улууһун кэрэ-бэлиэ сирдэринэн, педагогическай түмэлгэ экскурсияны кэрэхсээтибит. Бэйэбит эмиэ үлэбит үөрүйэҕиттэн сырдаттыбыт. Бүлүү уонна Амма эбии үөрэхтээһин тэрилтэлэрин икки ардыгар доҕордоһуу муостата уурулунна, ыкса сибээс олохтонно. Аны ВКС нөҥүө маастар-кылаастары тэрийиэҕиҥ, күөн күрэстэри ыытыаҕыҥ диэн былааннаатыбыт, уо.д.а. элбэҕи кэпсэттибит, толкуйдаатыбыт. Маны сэргэ, сайын Аммаҕа кэлэн биһиги үлэбитин-хамнаспытын билсэллэригэр ыҥырдыбыт.

Александра Егорова,

О.П.Иванова-Сидоркевич аатынан Амматааҕы айар сайдыы киин методиһа

Хаартыскалар А.Егорова тиксэриилэрэ