Дьоҕус нэһилиэк кыһалҕата

Уус Алдан улууһугар Бээрийэҕэ 174 киһи олорор, уһуйааҥҥа 9 оҕо сылдьар, оскуолаҕа 31 оҕо үөрэнэр. Онон нэһилиэнньэ ахсаана аҕыйаҕа үбүлээһиҥҥэ, штакка тиийэ туох охсуулааҕын бэркэ билэн олороллор.

Онон ситэриилээх былаас отчуоттуу кэлбит бөлөҕөр дьоҕус кэмпилиэктээх саҥа уһуйаан-оскуола тутуллара наадатын өссө төгүл тоһоҕолоон туруорустулар. Оччоҕо дьон көһүүтэ тохтуо, ыччат төннүө этэ дэһэллэр. Дьоҕус нэһилиэктэри чөл хаалларар бырагыраама баар дуо диэн ыйыттылар. Дьиҥэр бу 100% киин ититиигэ холбонон олорор, сибээс тардыллыбыт нэһилиэгэ буолар.

Уот остуолбаларын уларытыы туһунан ыйытыы киирдэ. Итиннэ отчуоттуур бөлөх салайааччыта Павел Аргунов «Якутскэнерго» билиҥҥи балаһыанньатын сиһилии быһааран баран, тустаах үлэһиттэр эппиттэринэн, улуустар уоттарын СИП-кэ көһөрүү уон сыл устатыгар барарын туһунан иһитиннэрдэ.

Бибилэтиэкэр Туйаара Никифорова олус баай түмэл бэйэтин дьиэтэ суоҕунан эспэнээттэрэ түөрт сиринэн тарҕанан туралларын эттэ. Түмэл дьиэтин көҥдөйө эрэ баарын, ону Бээрийэ 100 сылынан хайдах туруорсан ситэриэххэ сөбүн ыйытта. Итиннэ бырайыагын, экспертизатын оҥорторон баран, «Үтүө дьыала» хамсааһыҥҥа сайаапката биэр диэн сүбэлээтилэр.

Бээрийэлэр өссө биир улахан кыһалҕалара — суол. Онон суол алдьанар кэмигэр вездеход наадатын туруорустулар.

Дьэ итинник хас биирдии нэһилиэк бэйэтэ туспа кыһалҕалаах, уратылаах. Уһуйаан-оскуолабытын олох умнумаарыҥ диэн туран, бырабыыталыстыба үлэтин сөптөөҕүнэн сыаналаатылар.

Ааптар хаартыскаларга түһэриитэ