Дьоҕус, орто биисинэһи өйүөхтэрэ

Саха сиригэр дьоҕус уонна орто биисинэһи мэктиэлээһининэн өйүүргэ саҥа бородуукта үлэлээтэ. Бу туһунан Урбааны сайыннарыы пуондатын дириэктэрин корпоративнай дьыалаҕа солбуйааччы Андрей Миронов быһа эпииргэ иһитиннэрдэ.

«Бэҕэһээ, алтынньы  22 күнүгэр, пуонда кэтээн көрөр сэбиэтэ дьоҕус уонна орто урбаанньыттарга мэктиэлээһининэн өйөбүл саҥа бородууктатын бигэргэттэ уонна үлэлэттэ. Ону олоххо киллэрии атыылаһааччылар бэриниилээх буолууларын бөҕөргөтүө эрэ буолбакка, биһиги эрэгийиэннээҕи мэктиэлиир тэрилтэбит стратегиятыгар сөп түбэһэр. Онно сылга бииртэн итэҕэһэ суох аахсыйаны ыытар уонна пуонда мэктиэлээһинин ыстаапкатын кыччатыллыбыт бырыһыанынан биэрэр», — диэтэ Миронов.

«Суһал» бородуукта бу сыл бүтүөр диэри ОКВЭД бары категорияларынан пуонда партнерскай тэрилтэлэригэр үлэлиир. Бырыһыан 0,50% (0,10%-0,25% чэпчэтиилээх).

Кирэдьиит сууматыгар олоҕуран, чэпчэтэр ыстаапкалар туттуллаллар: 5 мөлүйүөнтэн 10 мөлүйүөҥҥэ диэри – 0,25%, 10 мөлүйүөнтэн үөһээ – 0,40% чэпчэтиилээх ыстаапка. Болдьоҕо 120 ыйга диэри. Кирэдьиит суумата хааччахтаммат. Поручитель  дуогабарынан эппиэтинэс 70% диэри. Көрүллэр поручитель суумата 40 мөлүйүөн солкуобайтан элбэҕэ суох (биир кэмнээх). Биир заемщикка эбэтэр ситимнээх хампаанньалар бөлөхтөрүгэр уопсай мэктиэ лимиитэ 50 мөлүйүөн солкуобайтан элбэҕэ суох.

Пуонда салайааччытын солбуйааччы этэринэн, кинилэр үс бородууксуйаны оҥороллор: «Приоритет», «Специальный» уонна «Срочный».

Сүбэни-аманы Дьокуускай куорат Орджоникидзе уулуссатын 50 нүөмэригэр баар пуондаҕа баран, төлөпүөнүнэн (+7 924 899-79-77), эбэтэр, «Мой бизнес»  офистарыттан ылыахха сөп.

Саха сиригэр  2007 сылтан урбааны сайыннарар пуондата үлэлиир. Тэрилтэ сүрүн сыала-соруга – дьоҕус уонна орто урбаанньыттарга мэктиэ тиийбэт  түгэнигэр төннөр үбүлээһини (кирэдьиит уонна баан гарантията) ылалларыгар мэктиэни биэрии буолар.

Тэрилтэ 2024 сылга уопсайа 2856,3 мөлүйүөн солкуобай суумалаах 130 дуогабары мэктиэлээбит.

Бу өйөбүл дьаһала бэрэсидьиэн Владимир Путин көҕүлээһининэн ыытыллыбыт «Эффективная и конкурентная экономика» национальнай бырайыагын чэрчитинэн барар, урбааны сайыннарыы көмөтүнэн экэниэмикэ туруктаах үүнүүтүн көҕүлүүр сыаллаах.

Сиһилии: https://www.sakha.gov.ru/news/14303