Дьоҕус урбааны өйүүр  боппуруос туора туран хаалыа суохтаах

Ил Дархан туһаайан этиитигэр дьоҕус урбааны өйүүр боппуруоска болҕомтотун ууруо диэн, норуот дьокутаата, Ил Түмэн урбааҥҥа, туризмҥа бастайааннай кэмитиэтин бэрэссэдээтэлэ, “Новые люди” бэлитиичэскэй баартыйа фракциятын чилиэнэ Алексей Корнилов санаатын эттэ:

— Ил Дархан туһаайан этиитигэр дьоҕус урбааны өйүүр  боппуруос туора туран хаалыа суохтаах дии саныыбын – билигин дойдуга балаһыанньа аһара кытаатта. Киин баан сүрүн ыстаапката үрдүгүнэн дьоҕус урбаан кирэдьиит ылара кыаллыбат буолан турар кэмигэр, ону тэҥэ түһээн реформатыгар бара турар дьайыылартан көрөн, федеральнай судаарыстыбаннай бэлиитикэ инники күөҥҥэ тутар соруктарыттан урбаан уһуллан кэриэтэ турар диэн түмүккэ кэлиэххэ сөп.

Мантан сибээстээн, урбаанньыттар эрэгийиэннээҕи уонна олохтоох былаас уорганнарыттан эрэ өйөбүлү күүтэллэригэр тиийэллэр. Ордук сыаналаах өйөбүлүнэн өрөспүүбүлүкэтээҕи Урбааны сайыннарар пуонданы балачча улаатыннарыы буолуон сөп, оччоҕо сөптөөх бырыһыаннаах кирэдьиит сылга 300 эрэ урбаанньыкка эрэ буолбакка, быдан элбэх урбаанньыкка бэриллиэн сөп.

Судаарыстыбаннай хантараагынан оҥоһуллубут үлэ төлөбүрүн хойутатыы тахсымыан наада, бу, бастатан туран, суол үлэтин салаатыгар сыһыаннаах. Төлөбүр кэмигэр түспэтэҕинэ, үлэһиттэригэр  хамнастарын болдьоҕор биэриэхтээх урбаанньыт үп-харчы өттүнэн туруктаах буолуута кутталланар, ону тэҥэ ордук хотугу улуустарга, бэйэтэ да аҕыйах бэдэрээтчит үлэлиир сиригэр, хампаанньалар үлэлэрин сабан кэбиһэр кутталлара үөскүүр.