«Дохсуҥҥа» буола турар «Наука 0+» бэстибээл түгэннэриттэн

Дьокуускайга «Дохсун» спортивнай комплекска оҕолуун улаханныын киһи ыы быччары.

Бүгүн манна «Наука 0+» Бүтүн Арассыыйатааҕы билим бэстибээлин аһыллыыта буолла.
Бэстибээли СӨ үөрэхтээһиҥҥэ, билимҥэ миниистирин бастакы солбуйааччыта Михаил Присяжнай эҕэрдэ тылынан арыйда:
«Быйылгы «Наука 0+» бэстибээл Новосибирскайга , Сочига уонна Дьокуускайга буола турар. Бэстибээл урут биир күн биир сиргэ буолар буоллаҕына, билигин ити таһымтан таҕыста. 2022 сыллаахха РФ Билимин уонна технологиятын уон сыла саҕаламмыта. Бу кэм иһигэр биһиги оҕолору кытта үлэлээн, дьоһун симиэнэни иитэн таһаарыахтаахпыт. Ким төһө саастааҕыттан, үөрэхтээҕиттэн, оскуолаҕа, үрдүк үөрэххэ хайдах үөрэммититтэн тутулуга суох  бары чинчийээччи буолуоххутун сөп. Эһиэхэ, эдэр чинчийээччилэргэ, дойду эрэнэр», — диэтэ.

Бүгүн манна «Дохсуҥҥа» билим араас хайысхатыгар Саха сирин учуонайдарын чаҕылхай ситиһиилэрин кэпсиир экспозициялар турбуттар, оҕолорго аналлаах интерактивнай оонньуулар, интэриэһинэй быыстапкалар, квестар, лиэксийэлэр буола тураллар.

«АрктикБио» хампаанньа Хоту сиргэ олорор киһиэхэ сөптөөх битэмииннэри уонна минераллары оҥорон таһаараллар. «Биьиэхэ омега3, С, Д битэмииннэр тиийбэттэр. Ол иһин маннык эбии астар, битэмииннэр формулаларын лабораторияҕа оҥорон баран, атын сиргэ таһаартарабыт. Дьон истиһэн, кэлэн атыылаһаллар», — диэн кэпсээтэ Алина Атастырова.

Вера Лиханова отонтон оҥорор пастилатын кэлбит дьон бары интэриэһиргиир. Куорат 6 нүөмэрдээх оскуолатын 10 кылааһын үөрэнээччитэ Карина отоннортон пастиланы оҥороллорун саҥа көрбүтүн эттэ. Кини бу быыстапкаҕа саҥа кэлбит, олус астыммытын, ордук бактериялары үөрэтиини интэриэһиргээбитин кэпсээтэ.
Саха политехническай оскуолатын 3 кылааһын үөрэнээччилэрэ кылаастарын салайааччыта Анна Баханованы кытта сылдьаллар.

Эһэлэри, саһылы көрбүттэрин, таабырыннары таайбыттарын, билигин ДНК аналиһын хайдах оҥороллорун көрө кэлбиттэрин кэпсээтилэр.
Хаҥалас улууһун Ой орто оскуолатын үөрэнээччилэрэ бэйэлэрэ кэпсии-көрдөрө, оҕолору оонньото сылдьаллар. Ол курдук 9 кылаас үөрэнээччитэ Михаил Матвеев эппитинэн, айылҕа тааһын булан алдьатан баран, оҕолорго пазл курдук холботтороллор. Мин көрөн турдахпына, бэркэ кыһаллан оҥоро сатаатылар да, наһаа судургу буолбатах быһыылаах.

Эмиэ Ой оскуолатын 6 кылааһын үөрэнээччитэ Айсан Титов сэлии тииһин туһунан кэпсээтэ. Сэлии түөрт эрэ тиистээх, алтата үүнэр эбит. Айсан өссө бизон моонньун уҥуоҕун көрдөрдө, маны Сиинэттэн булан аҕалбыттар. Мегалодон диэн былыргы олус улахан акула тииһин туһунан эмиэ кэпсии оҕуста. Бу оскуола оҕолоро экспедицияҕа куруук сылдьар буоланнар, көрдөрөллөрө-кэпсииллэрэ элбэх эбит.
Дьэ итинник бэрт интэриэһинэй быыстапка «Дохсуҥҥа» буола турар.