«Дьоһун саас» лааҕыр быйыл өссө үлэлиэ дуо?

Sakha-sire.ru саайтка Нам улууһун Хамаҕатта нэһилиэгэр «Дьоһун саас» биэнсийэлээхтэр түмсүүлэрэ аҕам саастаах дьоҥҥо анаммыт лааҕыры үлэлэтэн саҕалаабытын туһунан суруйуу тахсыбыта. Ааҕааччыларбыт интэриэһиргээн ыйыталлар: «Бу лааҕыр быйыл өссө үлэлиэ дуо? Атын сиртэн дьону ылар дуо?»

Лааҕыры салайар, олохтоох дьаһалта  уопсастыбаннаһы  кытта үлэҕэ исписэлииһэ Оротоо Сандаараҕа эрийэн, бу туһунан ыйыттыбыт.

— Лааҕырбыт бүгүн үһүс күнэ. Соҕотох олорор кырдьаҕастарбыт сэргэхсийэллэригэр, олоххо тардыһыылара күүһүрэригэр анаан тэрийбиппит. Сарсыарда эрдэ кэлэн, сэрээккэлииллэр, онтон аһыыллар. Ол кэнниттэн балаҕаҥҥа дьарыктар, маастар-кылаастар саҕаланаллар. Сорох күн атын сиргэ көрсүһүүлэргэ барабыт.

Лааҕырга сылдьар дьоммут олус астыналлар. Үлэбит түмүгэ ол буоллаҕа дии. Бу бастакы холонуубут буолан, кэлин хайдах табыгастаахтык ыытары өссө толкуйдуохпут, тупсарыахпыт. Быйылгы лааҕыр итиэннэ үлэлээбэт, эһиил үлэлэтиэхпит. Биһиги хантан да үбүлэммэппит, сылдьар дьонтон 1-дии тыһыынча солкуобайы хомуйбуппут, маны аһылыкка уонна улуус киинигэр киирэргэ, таксыыга туһанабыт.

Атын нэһилиэктэртэн дьону ылбаппыт. Биһиги холобурбутун үтүктэн, атын нэһилиэктэргэ аҕам саастаах дьоҥҥо анаммыт лааҕырдары тэрийэн үлэлэтиэхтэрин сөп. Баҕа эрэ наада. Үлэбитин ырытан көрөн баран, баҕар, эһиил граҥҥа киирсиэхпит, оччоҕо үлэбит далааһына кэҥиэ этэ, — диэн кини кэпсээтэ.

Лааҕыр иитиллээччилэрэ Л.С. Новгородова салалтатынан кылынан тымырдаайы оҥорууга үөрэннилэр. Намнааҕы педколледжка тиийэн, быыстапканы көрүөхтэрэ, Модут бэтэрээннэрин кытта көрсүһэн ирэ-хоро кэпсэтиэхтэрэ, сайыҥҥы чаҕылхай күнү көрсө ретро-фотосессия ыытыллыаҕа, пенсионнай управление иһинэн тэриллибит кииҥҥэ үөрэх ааһыахтара.